УИХ дахь МАН-ын бүлгийн хуралдаан өндөрлөлөө. Хуралдаанаар хэлэлцсэн асуудлын талаар УИХ дахь МАН-ын бүлгийн удирдлагууд мэдээлэл хийлээ. УИХ дахь МАН-ын бүлгийн дарга Д.Тогтохсүрэн:

Захиргааны хэргийн хуульд Ерөнхийлөгчийн тавьсан хоригийг тус бүлэг хүлээж авах боломжгүй гэж үзжээ. ҮХЦ-ийн гишүүн н.Ганзоригийн бүрэн эрхийн хугацаа дуусгавар болсонтой холбогдуулан УИХ-аас нэр дэвшүүлсэн байна. УИХ-ын дарга Г.Занданшатар ЗГХЭГ-ын тэргүүн дэд дарга Г.Баясгалангий нэрийг дэвшүүлснийг бүлэг дэмжсэн байна. 

Мөн Сонгуулийн хуулийг төслийг хэлэлцсэн байна. Сонгуулийн хуулийн төслийн ажлын хэсгийн ахлагч Л.Энх-Амгалан "Монгол Улс цаашдаа тогтвортой хөгжих шаардлага байна. Тиймээс Сонгуулийн хуулийг батлахдаа улсын эрх ашгийг тооцож, ард түмэнд ашигтай тогтолцоог ажлын хэсэг ярилцлаа. Мажоратори систем сонгогчдод ашигтай тогтолцоо гэж үзээд дөрвөн хувилбар дээр ярилцаж, Монгол Улс нэг тойрог байх нь зүйтэй гэж ажлын хэсэг үзлээ. Ингэснээр тойргийн асуудал бус улс орны хэмжээнд асуудлыг харж шийднэ" гэлээ. Тэд мэдээлэл хийснийхээ дараа  сэтгүүлчдийн асуултад хариулсан юм. 

-Монгол Улс нэг тойрог болохоор сонгогчид хэдэн хүнд саналаа өгөх вэ? Сонгуулийн сурталчилгааны хугацааг уртасгах уу? Орон нутгийн сонгуулийг яаж явуулах вэ?

УИХ-ын гишүүн Л.Энх-Амгалан:

-Сонгуульд оролцож байгаа 500-700 нэр дэвшигч байдаг. Тиймээс зохицуулалт хийх боломжтой гэж үзэж байгаа. 

УИХ-ын гишүүн Д.Лүндээжанцан:

-Өмнө нь энэ хувилбарыг ярьж байсан. Тэр үед тоолдог машин байгаагүй. Урт жагсаалт гарах нь гэж ойлгож байсан. Сонгогчдод сонголт олгож байгаа. Хаврын чуулганы хугацаанд багтааж, төслөө өргөн барьж, намрын чуулганы эхэнд батлах хэрэгтэй. Цаашдаа нэг жилийн өмнө Сонгуулийн хуулинд өөрчлөлт хийхийг хориглоно гэсэн заалт оруулна.