Энэ удаагийн орон нутгийн сонгуулиар эрх баригч хүчин МАН ялалт байгуулсан дүнтэйгээр өндөрлөж байна. Тэр дундаа нийслэлд эрх баригч хүчни үнэмлэхүй ялалт байгуулсан. НИТХ-ын 45 суудлын 34-ийг нь МАН авсан. Тиймээс өнөөдөр эрх баригч хүчинд өнөөдөр ирэх оны улсын төсөв, өвөлжилтийн бэлтгэл ажлын явц гэхээсээ албан тушаал, эрх мэдлийн өрсөлдөөн үргэлжилж байна.  Тэр дундаа ирэх дөрвөн жил нийслэлийг хэн удирдах вэ гэдэг таамаг хөвөрч, горилогчид ч өрсөлдөж эхэллээ.

Өнөөдөр нийслэлийн Сонгуулийн хороо НИТХ-ын дарга Р.Давгад нийслэл, дүүргийн ИТХ-ын сонгуулийн дүнг албан ёсоор  өргөн барилаа. Ингэснээр шинэ НИТХ-ын анхдугаар хуралдааныг товлож,  НИТХ-ын даргаа сонгоно. Дараагаар нь нийслэлийн Засаг даргыг томилох асуудал үргэлжлэх юм.

Нийслэлийн МАН-ын хороог УИХ-ын гишүүн Д.Сумъяабазар тэргүүлдэг.  МАН-ын Удирдах зөвлөл Нийслэлийн Засаг даргад томилох эрхмийн нэрийг санал болгоно. Гэсэн хэдий ч нийслэлд намдаа үнэмлэхүй ялалт авчирсан гэдгээрээ Д.Сумъяабазар МАН-ын дарга У.Хүрэлсүх нар тохиролцоно гэж улс төрийн хүрээнд яригдаж байна. Нийслэлийн Засаг дарга бөгөөд Улаанбаатар хотын захирагчид горилогчдоос хэн нь намын даргын, хэн нь нийслэлийн МАН-ын даргын үүдийг сахиж байгаа талаар бор шувуу ч нисч байна лээ.

Юутай ч МАН-ын Ерөнхий нарийн бичгийн дарга Д.Амарбаясгалан “Бидэнд улс төр, сандал суудал ярих хугацаа богино. Эрх барих бүтцийг тухайн шатандаа олонхи болсон улс төрийн намын байгууллага зохион байгуулна гэж үзэж байгаа” гэдгийг онцолж байсан. Үнэндээ ч дэлхий нийтийг хамарсан цар тахлаас урьдчилан сэргийлэх, эдийн засгаа тогтворжуулж иргэдийн амжиргаанд анхаарахаас эхлээд нийслэлийн өвөлжилтийн бэлтгэл гээд цаг үеийн тулгамдсан асуудал ар араасаа ундарч байгаа. Тэгээд ч хотын асуудал үргэлжид урган гарч байдаг.

Нийслэлийн Засаг дарга одоогийн үүрэг гүйцэтгэгч Ж.Батбаясгалан томилогдохоор горилж байгаа нь мэдээж. Гэхдээ нийслэлийн МАН-ын хорооны дарга Д.Сумъяабазарт нийслэлийн МАН-ын хорооны дэд дарга Н.Алтаншагайг зүтгүүлэх саналтай байгаа гэсэн яриа гарч байна. Түүнчлэн одоогийн НИТХ-ын дарга Р.Дагва, Хан-Уул дүүргийн Засаг дарга Ж.Алдаржавхлан нарыг ч хотын даргад зүтгүүлэх магадлалтай гэсэн таамаг байна.  Гэхдээ НИТХ-ын дарга Р.Дагвын тухайд энэ албан тушаалдаа улиран сонгогдох магадлалтай.

Эрх баригч хүчин МАН өнгөрсөн дөрвөн жил “Аз жаргалтай Улаанбаатар” уриатай ажилласан. Улаанбаатарын түгжрэл, нийтийн тээврийн доголдол, утаа, автозамын гээд нийслэлйн олон асуудал тулгамдсан хэвээр байгаа. Өнгөрсөн жилээс нийслэлд түүхий нүүрс нэвтрүүлэхийг хориглож, сайжруулсан шахмал түлшээр хангаж байгаа. Үүний үр дүнд агаарын бохирдол тодорхой хэмжээгээр буурсан ч шахмал түлш илч муутай, угаартуулдаг гэсэн иргэдийн шүүмжлэл дагалддаг. Ирэх онд Улаанбаатар хотын утааг 80 хувиар бууруулах зорилт тавьсанаа Ерөнхий сайд У.Хүрэлсүх 2021 оны улсын төсвийг хэлэлцүүлэх илтгэлийг чуулганы хуралдаанд тавихдаа мэдэгдсэн.

Харин өнөөдөр Нийслэлийн МАН-ын хорооны дарга Д.Сумъяабазарын хэлсэнчлэн “Ажилдаа шуурхай орж, тулгамдсан асуудлаа шийдэх”-ийн тулд нийслэлийн Засаг даргаар томилогдох эрхэмд 1.5 сая хүн амтай, том эдийн засагтай Улаанбаатар хоттой танилцах зав байхгүй, “хот мэдэхгүй” нэгнийг ч эрх баригчид хотын мэрийн албан тушаалд томилохгүй гэж найдна.

Хотын даргад санаархах нэг хэрэг, хотын даргаар томилогдон ажил хийх, иргэдийн төлөө зүтгэх нь бүүр ч өөр асуудал гэдгийг томилгоо хийх эрхмүүд анхаарах биз ээ.

Н.Энхлэн