Засгийн газрын шийдвэрээр Улсын хэмжээнд бүх айл өрх, зарим аж ахуйн нэгжийн цахилгаан, дулаан, ус, хогны төлбөрийг 2020 оны 12 дугаар сарын 01-ний өдрөөс 2021 оны 07 дугаар сарын 01-ний өдрийг хүртэл төр бүрэн хариуцахаар болсон. 

Цахилгааны төлбөрийг төр хариуцах болсонтой холбогдуулж хэрэглээ огцом өсвөл бид эх үүсвэрийн чадлын дутагдалд орж хүндрэл гарах магадлалтай. Энэ тал дээр төрөөс хэрэгжүүлэх зохицуулалтаас илүүтэйгээр манай иргэд, ААНБ-ын зохистой хэрэглээ, хэмнэлттэй горим үр дүнгээ өгнө. Энэхүү арга хэмжээг дэмжиж, хамтарч ажиллаж чадна гэдэгт найдаж байна" гэж Эрчим хүчний сайд Н.Тавинбэх хэлсэн.

Иргэд цахим орчинд "Үнэ төлбөргүй ч ус, цахилгаанаа хэмнэнэ" гэсэн уриалгыг эхлүүлээд байна. Зөвхөн сошиалд нэгдэхээс гадна  иргэн бүр, гэр гэртээ цахилгаанаа хэрхэн хэмнэх тухай зөвлөмжийг бэлтгэлээ. 

Бидний тэр бүр анзаардаггүй ашиггүй хэрэглээ маш олон. Гэвч ашиггүй хэрэглээ цахилгаан эрчим хүчийг дэмий үрдэг.  Тухайлбал гар утсаа цэнэглэж дууссан бол цэнэглэгчээ заавал цахилгаан үүсгүүрээс салгаж хэвшихийг зөвлөж байна. Мөн шөнө унтахаасаа өмнө бүх цахилгаан хэрэгслээ залгуураар нь салгаж байх нь эрчим хүчээ хэмнэхэд бодит дэмжлэг болох нь ээ. 

1. Суурин компьютероос илүү зөөврийн /нөүтбүүк/ компьютер хэрэглэхийг хичээгээрэй. Учир нь зөөврийн компьютер нь цахилгааны  ердөө 10 хувийг л зарцуулдаг. Тиймээс суурин компьютероос илүү эрэлт ихтэй байдаг.

2. Оргил ачааллын үеэр буюу 18.00-22.00 цагийн хооронд эрчим хүчний хэрэглээг аль болох багасгахыг хичээгээрэй. Тухайлбал хоолоо эртхэн хийж идэж хэвшээрэй. Орой 18.00 цагаас хойш хоол идэхгүй байх нь таргалалтаас сэргийлэхэд тустай. 

3. Хоол хийхдээ сав суулгын ёроолыг тэгшхэн эсэхийг шалгаарай. Цахилгаан зуухны гадаргууд бүрэн хүрэлцээгүй тохиолдолд халалтыг удаашруулна. 

4. Хөргөгчний хаалгыг удаан хугацаагаар нээлттэй байлгах нь цахилгааныг маш ихээр үрдэг. Тиймээс хөргөгчөө онгойлгохоосоо өмнө юу авах тухайгаа сайтар эргэцүүлж байгаарай. Мөн хөргөгчийг цахилгаан халаагуур, зуухтай зэрэгцүүлэн байрлуулсан эсэхээ шалгаарай. Учир нь хөргөгч гаднаасаа халах нь хөргөгчний ажиллагааг удаашруулдаг байна.

Магадгүй та хөргөгч худалдан авахаар төлөвлөж байгаа бол хаалган дээрх А В С D гэсэн тэмдэглэгээг анзаараарай. А тэмдэглэгээ дотроо А хоёр нэмэх, А гурав нэмэх гэж ангилагддаг. А гурав нэмэх тэмдэгтэй нь эрчим хүчний хамгийн өндөр хэмнэлттэй бараа бүтээгдэхүүн юм.

5. Хэдий бид шөнийн цагаар унтаж амардаг ч та завтай, боломжтой бол угаалгын машинаа шөнө ажиллуулахаас эхлээд эрчим хүчээ хэмнэхэд хувь нэмрээ оруулах боломж байна. Шөнө иргэдийн хэрэглээ багасдаг ч цахилгаан станцууд ердийн ажиллаж эрчим хүч үйлдвэрлэсээр байдаг. 

6. Хэрвээ танайх энгийн гэрлийн чийдэн хэрэглэдэг бол үүнийг хэмнэлттэй чийдэнгээр /CFL lamp/ солиорой. Энэ чийдэн нь цахилгааныг 75 хэмнэхээс гадна энгийн чийдэнгээс 10 цаг илүү ажиллах  чадалтай. Ном уншихдаа ч өрийнхөө гэрлийг асаахаас илүүтэй ширээний чийдэн сонгоорой. 

7. Компьютер болон зурагтыг удирдлагаар унтраахаас гадна, унтраах товчийг даран залгуураар нь салгаж улаан гэрлийг нь унтрааж байгаарай.

8. Хэдхэн минутын дараа буцаад орж ирэх байсан ч өрөөний гэрлээ унтраагаад гараарай. 

9. Хүйтний улиралд цонх онгойлгохын оронд өрөөнийхөө халаалтыг багасгаарай. 

10. Усны онгоцны /ванн/ оронд шүршүүр ашиглаарай.Таван минут шүршүүрт ороход усны онгоцонд орох усны талтай тэнцэх халуун ус ашигладаг. Тэгэхээр ус халаах эрчим хүчийг хэмнэж болно. 

Эцэст нь зөвлөхөд шүдээ угаахдаа усаа хааж байгаарай. Харин усаа аяганд хийж тохируулан хэрэглээрэй. Энэ нь ус, цахилгаан хоёуланг нь хэмнэнэ. 

Цахилгаан, дулааны төлбөр тэглэсэнтэй холбогдуулан 650 тэрбум төгрөгийг "Эрдэнэт үйлдвэр" төрийн өмчит үйлдвэрийн газар гаргах юм. 

2021 оны 07 дугаар сарын 01 хүртэл:

 

-       Гэр хорооллын айл өрх дунджаар 240-530 мянган төгрөгийн цахилгааны

 

-       Орон сууцны айл өрх талбайн хэмжээнээс хамаарч 560 мянгаас 1,1 сая 

 

-       Жижиг, дунд аж ахуйн нэгж 7-30 сая 

 

-       Томоохон аж ахуйн нэгж 500 саяас 1,4 тэрбум төгрөгийн цахилгаан, дулааны мөнгө хэмнэх тооцоо гарчээ.   

Бидний халааснаас хэмнэсэн энэ мөнгийг бид ч мөн хэмнэж хариу барих нь зүйтэй биз ээ. 

Бэлтгэсэн: Г.Сүрэн