Өнгөрсөн бямба гарагт Орос даяар болсон эсэргүүцлийн жагсаалын үеэр цагдаагийн тусгай хэлтсийнхэн жагсагчдыг тараах, баривчлах үеэрээ хэрцгий, ширүүн хандаж байсныг гэрчлэх олон баримт, гэрэл зураг, мэдээллүүд гарч байлаа. 

Үүний нэг нь 54 настай эмэгтэйг цагдаа гэдэс рүү нь өшиглөж буй дүрс бичлэг байв. Хохирогч эмэгтэйг Маргарита Юдина гэх бөгөөд Санкт-Петербургийн эсэргүүцлийн жагсаалын үеэр тархиндаа битүү гэмтэл авч, эмнэлэгт хүргэгдэж, биеийн байдал нь сайжирсан тул эмнэлгээс гарсан гэж NEWS.ru мэдээлжээ. 

Өмнө нь гарч байсан мэдээллээр, цагдаа эмэгтэйг өшиглөхөд эмэгтэй унахдаа асфальт мөргөсний улмаас тархиндаа битүү гэмтэл авсан байна. Энэ үйл явдлын дараа Петербургийн прокурорын газар, хотын Дотоод хэргийн газар хэргийг мөрдөн шалгах ажиллагааг эхлүүлжээ.

Албаны эх сурвалжууд, Маргарита Юдинаг өшиглөсөн цагдаагийн албан хаагчийг тогтоогоогүй гэж мэдээлж байгаа ч  Telegram-канал Mash мэдээлснээр хэрэгт холбогдсон цагдаа эмнэлэг дээр очиж, цэцэг өгөн, уучлалт гуйсан байна. 

"Намайг уучлаарай, энэ явдал болохоос таван минутын өмнө над руу хий цацаж, би юу ч харж чадахгүй байсан. Юу болж өнгөрснийг мэдсэнийхээ дараа маш их цочирдсон, миний хувьд үнэхээр эмгэнэлтэй байсан гэдгийг чин сэтгэлээсээ тангараглаж байна" хэмээн цагдаа эмнэлгийн орон дээр байх эмэгтэйгээс уучлалт гуйжээ. 

Хохирогч эмэгтэй ч цагдааг уучилж, "Бүү санаа зов. Бүгд амьд мэнд байна. Сайхан цэцэгс байна. За яах вэ, санаа зовох юмгүй. Бурхан таныг ивээг" хэмээн хариулсан гэнэ.

Түүнчлэн эмнэлэг дээр Оросын Дотоод хэргийн яамны удирдах газрын Нийтийн хэв журмыг сахин хамгаалах газрын дарга, цагдаагийн хурандаа Сергей Музыка очиж, байгууллагынхаа нэрийн өмнөөс уучлалт гуйжээ. Хуулийн хүрээнээс давсан хүчнийхний үйлдлүүд байж болшгүй хэмээн цохон тэмдэглээд хэргийг шалгаж, шаардлагатай бол тусламж үзүүлнэ хэмээн амалсан байна.

Эмэгтэйн гэдэс рүү өшиглөсөн цагдаад сахилгын ямар арга хэмжээ авах нь одоогоор тодорхойгүй. Харин Петербургт болсон жагсаалын үеэр нэг жагсагч эмэгтэйг өшиглөсөн Оросын гвардын алба хаагч  халагджээ.

Г.Бямбасүрэн