Хоёрдугаар сард Украин руу түрэмгийлж, дайн дэгдээсэн ОХУ бие бүрэлдэхүүний хохирол ихээхэн амсаж, одоо хүн хүч дутагдаж байгаа гэж барууны шинжээчид удаа дараа мэдэгдэж байв. ОХУ "төрийн нууц" гэсэн шалтгаанаар дайнд амссан хохирлынхоо талаар огт зарлахгүй байгаа тул хичнээн цэрэг амиа алдсан, Оросын армид хичнээн цэрэг хэрэгтэй нь тодорхойгүй байгаа юм. Гэхдээ сүүлийн үед сайн дурын цэрэг элсүүлэхээр алслагдсан бүс нутгуудын оршин суугчдад өндөр шан харамж амлаж, хорих газруудад очин цэрэг элсүүлэхээр ухуулж байгаа нь ОХУ үнэхээр л бие бүрэлдэхүүний ноцтой хохирол амссан, үүнийгээ нөхөхөөр чармайж байгаа гэлтэй. 

ОХУ сайн дурын цэрэгт элсүүлэх олон арга хэрэглэж байгаагийн дотор цагаачдад чиглэгдсэн нэгэн арга хэмжээ авч хэрэгжүүлэхээр болжээ. ВВС агентлагийн мэдээлснээр Москва хотын эрх баригчид "Сахарово" цагаачлалын төвд цэргийн комиссарын газар байгуулахаар болсон бөгөөд энэ нь Оросын иргэншлийг хялбаршуулсан журмаар авах хүсэлтэй хүмүүс гэрээгээр цэргийн алба хаахаар бүртгүүлэх цэг байх гэнэ.

"Ойрын үед Москвагийн засгийн газар гадаадын иргэдийг цэргийн албанд элсүүлэх ажилд Оросын Батлан хамгаалах яамд дэмжлэг үзүүлэх үүднээс "Сахарово" төвд холбогдох албыг байгуулна" хэмээн Москва хотын дарга Сергей Собянины албан ёсны Телеграм хуудсанд өгүүлжээ.

Ийм мэдэгдлийг холбогдох хуульд Төрийн дум нэмэлт өөрчлөлт оруулсны дараа хийсэн байна. Хуулийн нэмэлт өөрчлөлтийн дагуу Оросын зэвсэгт хүчинд жилийн хугацааатй алба хаах гэрээ байгуулсан хүмүүс Оросын иргэншлийг хялбаршуулсан журмаар авах аж.

Тодруулбал, гадаадын иргэд Оросын иргэн болохын тулд оршин суух зөвшөөрөл авч, Орост таван жилийн турш амьдрах ёстой байдаг. Харин цэргийн алба хаах гэрээ байгуулвал энэ шаардлагуудыг хангаагүй байсан ч ОХУ-ын иргэншил авах боломжтой болжээ. Өмнө нь гурван жилийн гэрээт цэргийн алба хаахаар болсон тохиолдолд цагаачдад ийм боломж олгодог байсан гэнэ. 

Хэдийгээр Москва хотод цэргийн комиссарын газар байгуулахаар болсон ч Москвагийн оршин суугчдад энэ хамааралгүй, бусад бүс нутгаас ирсэн хүмүүсийг цэрэгт элсүүлэхээр зэхэж байгаа гэж "Медуза" мэдээлсэн байна.

"Собянин дайнаас хол байх, Оросын түрэмгийлэл эхэлснээс хойш нийслэл дэх амьдрал огт өөрчлөгдөөгүй гэж харуулахыг хичээж байгаа" хэмээн Медуза мэдээлжээ.

Эрүүгийн хуульд өөрчлөлт оруулав 

Цагаачдад иргэншил олгох тухай өөрчлөлтийг хуульд оруулсны зэрэгцээ Эрүүгийн хуульд ч өөрчлөлт оруулж, шинэ нэр томъёо, тодорхойлолтуудыг багтаасан нь ОХУ даяар ихээхэн шуугиан дэгдээж, "бүх нийтийн дайчилгаа зарлаж болзошгүй" гэсэн болгоомжлолыг төрүүлжээ. Учир нь энэ өөрчлөлтөд "дайчилгаа", "дайны байдал", "дайны цаг" гэсэн ойлголтуудыг багтаасан юм. 

ОХУ-ын Эрүүгийн хуульд оруулсан өөрчлөлтүүд: 

- Сайн дураар олзлодвол 3-10 жилийн хорих ял 

- Байлдааны талбарт дээрэм тонуул хийх- 15 хүртэлх жилийн хорих ял 

- дайчилгааны үед болон дайны байдал зарласан үед хэсгийг дур зоргоороо орхин явах - 2-10 хоног орхин явсан бол 5 хүртэлх жил, 10 хоногоос сарын хугацаатай орхин явсан бол 7 хүртэлх жил, нэг сараас дээш хугацаатайгаар орхин явсан бол 5-10 жилийн хорих ял оноох

- Даргын өгсөн тушаалыг гүйцэтгээгүй, цэргийн эсвэл байлдааны үйл ажиллагаанд оролцохоос татгалзвал 2-3 жилийн хорих ял

- Дайчилгаа эсвэл дайны байдлын үед, дайн эсвэл зэвсэгт сөргөлдөөн, байлдааны үйл ажиллагааны үед гэмт хэрэг үйлдвэл хүндрүүлэх нөхцөлөөр авч үзнэ гэсэн  шинэ заалтуудыг тусгажээ. 

Эдгээр өөрчлөлтүүдийг оруулсны дараа Оросын иргэдийн дунд бүх нийтийн дайчилгаа зарлана гэсэн түгшүүр, болгоомжлол төрсөн ч эрх баригчид нь урьдын адил няцаасан байна. 

"Бүх нийтийн дайчилгаа болохгүй. Энэ талаар Ерөнхийлөгч хэвлэлийн нарийн бичгийн дарга Дмитрий Песковоор дамжуулан, мөн өөр олон өндөр албан тушаалтан удаа дараа хэлж байгаа. Дайчилгаа болохгүй" гэж Эрүүгийн хуулийн нэмэлт өөрчлөлтийн төслийг боловсруулагчдын нэг, Төрийн думын гишүүн Андрей Картаполов мэдэгдсэнийг Коммерсант агентлаг дамжуулсан байна. 

Г.Бямбасүрэн