БНСУ-д хууль бусаар амьдарч буй 16 мянган иргэнийг хууль ёсных болгохтой холбоотой шийдвэр гаргахаар болсон талаар Нийслэлийн Засаг дарга бөгөөд Улаанбаатар хотын Захирагч Д.Сумъяабазар нийгмийн сүлжээндээ мэдээлжээ.

Тэрбээр "БНСУ-д хууль бусаар хөдөлмөр эрхэлж байгаа 16 мянган иргэнийг хууль ёсны болгох тухай шийдвэр гаргахад БНСУ-ын эрх барьж буй нам буюу “Ард түмний хүч” намын удирдлагууд холбогдох шийдвэр гаргахаар болсон гэдгээ уулзалтын үеэр илэрхийллээ. Энэ нь Ерөнхий сайд Л. Оюун-Эрдэнийн айлчлалын хүрээнд 2 дугаар сард анхлан яригдсан асуудал юм.

БНСУ-ын нөхцөл байдал хүнд байх үед иргэд нь гадаад улсад хөдөлмөр эрхэлж, эх орныхоо эдийн засагт хувь нэмэр оруулж байсан түүх бий. Одоо бидний туулж яваа бэрхшээлтэй БНСУ ч нүүр тулж байсан гэсэн үг. Тэгэхээр БНСУ-ын эрх баригч намын удирдлагууд үүнийг ойлгож, нааштайгаар хүлээж авч байгаад баяртай байна. БНСУ-д ажиллаж, амьдарч байгаа иргэдийн асуудал хотын даргын хариуцах асуудал биш. Гэхдээ эх орныхоо төлөө, иргэдийнхээ төлөө гарсан боломжийг алдах ёсгүй" гэжээ.