Улсын Их Хурал дахь Ардчилсан намын бүлэг Ерөнхий сайдын чуулганы индрээс хэлсэн үгтэй холбоотойгоор авсан завсарлагаа энэ долоо хоногт дуусгаж, нэгдсэн чуулганы хуралдаанд оролцохоо албан ёсоор мэдэгдлээ.

УИХ-ын гишүүн Ж.Баярмаа энэ үеэр үүсээд буй нөхцөл байдалтай холбогдуулан албан ёсны байр сууриа илэрхийлэв. Тэрээр өнөөдөр Ардчилсан намын бүлгийн даргатай хамт Монгол Улсын Ерөнхий сайдтай уулзсан байна.

“Улстөрийн орчинд буруу зөрүү ойлголт, хардах сэрдэх зүйлс байж болдог. Ерөнхий сайд надаас албан ёсоор уучлал гуйсан. Гэвч миний тавьсан асуултын маргааш өдөр хувийн амьдрал, хүүхдүүдийг минь хавчуулсан гүтгэлгийн шинжтэй мэдээлэл цахим орчинд тархсан. Энэ асуудлаар иргэн хүний хувьд холбогдох байгууллагад хандан, шалгуулахаар болсон” хэмээн тэрээр мэдэгдлээ.

Мөн Ж.Баярмаа “Ерөнхий сайдтай өрнөсөн үл ойлголцол болон чуулганы танхимд болсон яриаг далимдуулан Ардчилсан намыг харлуулах гэсэн оролдлогыг хүлээн зөвшөөрөхгүй. Гүтгэлэг гэдэг нь хэмжээ хязгаартай байх ёстой. Би өмнө нь төсвийг шүүмжилснийхээ төлөө өвчтэй гэх мэдээлэлд өртөж байсан. Харин энэ удаа миний хүүхдийн зургийг нийтэлж, гүтгэлэг тараасан нь тэвчих аргагүй зүйл болсон. Иймд би холбогдох байгууллагад гомдол гаргана” гэлээ.

Тэрээр мөн “Иргэдийн шүүмж хүрэхгүй байгаа энэ цаг үед бид, УИХ-ын гишүүд шүүмжилж байж л асуудлыг урагшлуулна. Буруу зүйлд би үргэлж хурц байр суурь баримталдаг. Ерөнхий сайдын уучлалыг хүлээн зөвшөөрч байгаа ч шүүмжлэх зүйлээ үргэлжлүүлэн хэлнэ” хэмээн онцоллоо.