МАН-ын Бага хурлын гишүүдийн олонх хамтарсан Засгийн газраас АН-ыг гаргаж, дангаараа засаг байгуулахыг дэмжлээ. Ерөнхий сайд Л.Оюун-Эрдэнэ нам нь хамтарсан Засгийн газрыг дэмжихгүй бол өөрийн хүсэлтээр огцрохоо мэдэгдсэн юм. МАН-ын бага хурлаас гарсан энэхүү шийдвэрийг өнөөдөр АН болон ХҮН намд танилцуулах аж. Өөрөөр хэлбэл, Л.Оюун-Эрдэнийн АН, ХҮН намтай хамтарсан Засгийн газар бүрэн бүрэлдэхүүнээрээ огцрох нөхцөл үүслээ.

Харин дараагийн Ерөнхий сайдад одоогийн Сангийн сайд Б.Жавхлан яригдаж байгаа сураг байна. 

2025 оны улс төрийн гол “сэлгээ” аль хэдийн эхэлчих шиг боллоо. Ерөнхий сайд Л.Оюун-Эрдэнийг огцрох талаарх мэдээлэл улс төрийн хүрээнд баталгаажиж, түүний залгамжлагчаар Сангийн сайд Б.Жавхлан тодрох нь бараг тодорхой болсон тухай эх сурвалжууд онцолж байна.

Б.Жавхлан бол намын дотоод бүтэц дэх “тоглогч” биш мэт харагддаг ч сүүлийн жилүүдэд улс төрийн жинтэй албан тушаалуудыг төвөггүй гүйцэтгэсээр ирсэн. Тэрээр Монголбанкны дэд ерөнхийлөгч, УИХ-ын гишүүн, Сангийн сайдаар ажилласан туршлагатай. Сангийн сайдын хувьд олон улсын санхүүгийн байгууллагуудтай тогтвортой харилцаа бий болгосон, төсвийн сахилга бат, төсөвлөгчийн үүрэгт нэр хүнд олж авсан нь түүнийг намын дотор “тогтвортой удирдагч” хэмээн үнэлэгдэх үндэслэл болжээ.

МАН-ын удирдлагын түвшинд, тэр дундаа ахмад гишүүд болон эдийн засгийн чиглэлийн бүлэглэл дотор Б.Жавхланг дэмжих хандлага хүчтэй. Учир нь дараагийн Ерөнхий сайд эдийн засгийн тогтворгүй байдал, өрийн дарамт, инфляцын хүнд нөхцөл дунд “гэнэтийн популизм” биш, хариуцлагатай бодлого явуулах шаардлагатай гэдгийг намын төв аппарат ойлгосон гэж найдаж байна.

Улс төрийн тохироо: Б.Жавхлан Ерөнхий сайд болсон тохиолдолд Ерөнхийлөгчийн Тамгын газар, УИХ дахь гол фракцуудтай балансыг хадгалах “итгэлцлийн тогтолцоо” бүрэлдэх магадлал өндөр.

Сонгуульд бэлтгэх шинэ стратеги: МАН 2028 оны УИХ-ын сонгуульд оролцохдоо “тогтвортой хөгжлийн бодлого” хэмээх шинэ концепцоор орж болзошгүй. Үүнд Б.Жавхлангийн эдийн засгийн чиглэлийн менежмент гол суурь болох магадлалтай.