Сүүлийн өдрүүдэд Төрийн ордон урьдынхаас илүү “амь орсон” дүр зурагтай байна. Гэвч энэ нь ард түмний төлөө гар нийлэн ажиллаж, хууль батлах гэж яарсан гишүүдийн хөдөлгөөн биш. Харин чуулганд суухгүй “гүйлдэж” яваа гишүүдийн ихэнх нь шинэчлэгдэх гэж буй Засгийн газарт байр суурь эзлэх, сайдын ширээний төлөөх “зодоон”-д байр сууриа бататгах санаатай бололтой.

Шинэ Засгийн газрын бүрэлдэхүүнд орох хүсэлтэй гишүүдийн хувьд ирэх долоо хоног “амьдрал шийдэгдэх” чухал үе. Тиймдээ ч улс төрийн “наймаа”, фракц хоорондын тохиролцоо ид өрнөж байна. Хэн аль фракцыг дэмжиж, ямар бүлэглэлд багтаж, юун дээр санал өгнө, үүний хариуд ямар суудал, эрх мэдэл ирэх вэ гэдэг бодлогоор явж буй олон гишүүн бий.

Ашиг сонирхлын зөрчил ба ард түмний мартагдсан эрх

Төрд зүтгэх ёстой хүн түмний төлөө бус, өөрийн ашиг сонирхлыг урьтал болгодог тогтолцоо “өөрчлөгдөнө” гэсэн итгэлийг ард түмэн дахин хүлээх чадалгүй болж байна. Яг энэ өдрүүдэд УИХ-ын гишүүдийн олонх нь шинэ сайд болох, эсвэл “сайдад нэр дэвшүүлэх эрх мэдэлтэй” гэгдэх фракцын дэмжлэг авахын төлөө улайран зүтгэж буй нь эрх мэдэл, албан тушаал бол зүгээр л арилжааны хэрэгсэл болж хувирсны илрэл мэт.

Бодолтой суудал, бодлогогүй шийдвэр

Хэрэв энэ удаагийн шинэ Засгийн газар фракцын тохиролцоонд тулгуурласан, хар амиа бодсон томилгоогоор бүрдэнэ гэвэл Монголын эдийн засаг, нийгмийн бодлогод бодит ахиц гарахгүй. Харин ч үр ашиггүй зардал, хариуцлагагүй ажил, нэр хүнд унасан Засгийн газрын “дараагийн хувилбар” л бий болох магадлал өндөр.
 Төрийн ордны хаалга мэргэшсэн бодлоготой лидерүүдэд бус, тохиролцоо хийж чаддаг “улстөрчдөд” илүү нээлттэй мэт. Харин ард иргэдийн итгэл даах, улс орныг хямралаас гаргах бодит хөтөлбөр, бодолтой шинэчлэл хүлээгдсэн хэвээр…