Нийслэлийн Сүхбаатар дүүргийн ерөнхий прокурор асан Э.Амарбатад холбогдох эрүүгийн хэргийн шүүх хурал өнөөдөр, 2025 оны тавдугаар сарын 28-ны өдөр Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхийн байранд товлогджээ. Түүнийг авлигын хэргээр шалгаж, 2024 оны арванхоёрдугаар сард албан тушаалаас нь чөлөөлсөн байна. Тухайн үед прокурорын байгууллагаас энэ асуудлаар тайлбар өгөхдөө, “Прокурор гэмт хэрэгт холбогдсон тохиолдолд хуулийн байгууллагаар шалгуулдаг. Авлига, албан тушаалын гэмт хэрэгтэй тэмцэх, урьдчилан сэргийлэх чиглэлээр бид тодорхой арга хэмжээ авч хэрэгжүүлж байна” гэж мэдэгдэж байв. Э.Амарбат нь өмнө нь Улсын ерөнхий прокурорын газрын Дотоод аюулгүй байдлын хэлтсийн дарга, Авлигатай тэмцэх газрын Мөрдөх байцаах хэлтсийн дарга, мөн УЕП-ын дэргэдэх Мөрдөх байцаах албаны мөрдөн байцаагчаар ажиллаж байсан туршлагатай.