“Төгрөг нуур”-ын ордыг 250 сая ам.доллароор гадаадын компаниудад зарсан гэх асуудал улс төрийн өндөр шатанд хүрч, УИХ-ын гишүүн Х.Баттулгын бүрэн эрхийг түдгэлзүүлэх асуудал сөхөгдөж магадгүй байна.

Засгийн газрын Хэрэг эрхлэх газрын дарга Н.Учрал уг асуудлыг АТГ-т шилжүүлсэн бөгөөд Х.Баттулга тавдугаар сарын 19-нд анх удаа АТГ-т мэдүүлэг өгсөн. Харин Улсын Ерөнхий прокурор Б.Жаргалсайхан түүний бүрэн эрхийг түдгэлзүүлэх саналыг ойрын хугацаанд УИХ-д хүргүүлэхээр төлөвлөж байгаа талаар хэвлэлээр бичигдээд буй.

Хэргийг мөрдөн шалгахад Х.Баттулгын УИХ-ын гишүүний халдашгүй байдал саад учруулж буй тул энэ алхам зайлшгүй хийгдэж болох л юм.

Н.Учралын мэдэгдсэнээр, “Төгрөг нуур”-ын ордод холбогдох схемд Х.Баттулга, түүний охин Б.Намуун, эгч Х.Цэндбаяр нарын нэр бүхий оффшор дамжсан хэлхээ холбоо оролцсон, мөн тэдний үүсгэн байгуулсан “Camex” компани ордыг 100 хувийг эзэмшдэг байсныг баримтаар нотолжээ.

Хамгийн анхаарал татах баримт бол  анх 250 сая ам.доллараар зарагдсан энэхүү компани 2016 онд Монголд үнэ төлбөргүй шилжсэн байдаг. Үүнийг татвараас зайлсхийх, мөнгө угаах, авлигын шинжтэй үйлдэл гэж үзэж болзошгүй хэмээн ЗГХЭГ дүгнэж, бүх материалыг АТГ болон Ерөнхий прокурорт хүргүүлжээ.

Цаашид уг ордыг “стратегийн орд”-ын жагсаалтад оруулж, Үндэсний баялгийн санд шилжүүлэх шийдвэр гаргах бэлтгэл хийгдэж байгаа аж.

Түүх давтагддаг. Гэхдээ энэ удаа баримт илүү тодорхой, эрх мэдэл нь илүү хүчтэй тал илүү ихийг мэдэж байгаа бололтой.