2025 оны зургадугаар сарын 12-ны өдөр Улсын Их Хурлын хаврын ээлжит чуулганы нэгдсэн хуралдаанаар Монгол Улсын Ерөнхий сайдыг томилох асуудлыг хэлэлцэн, Гомбожавын Занданшатарыг Монгол Улсын 34 дэх Ерөнхий сайдаар томиллоо. Ерөнхий сайдад нэр дэвшүүлсэн саналыг Монгол Улсын Ерөнхийлөгч У.Хүрэлсүх УИХ-д танилцуулсан бөгөөд Үндсэн хуулийн дагуу олонхийн суудал авсан намын дэвшүүлсэн нэр дэвшигчийг томилох шийдвэрийг УИХ гаргалаа.

Г.Занданшатар нь төрийн болон улс төрийн салбарт олон жил ажилласан, бодлого боловсруулах болон хэрэгжүүлэх түвшний туршлагатай нэгэн. Эдийн засагч мэргэжилтэй тэрбээр банк санхүү, гадаад харилцаа, хууль тогтоох болон гүйцэтгэх засаглалын бүх шатанд ажиллаж, Монгол Улсын хөгжлийн бодлого, төрийн зохион байгуулалтад бодит хувь нэмэр оруулж ирсэн юм.

Түүнийг Ерөнхий сайдаар томилогдож буй энэ үед улс орны өмнө тулгамдсан олон чухал сорилт, шийдэх шаардлагатай асуудал хүлээж байна. Төсвийн алдагдлыг бууруулах, эдийн засгийг идэвхжүүлэх, төрийн данхар бүтцийг цомхон, үр ашигтай болгох, авлига хээл хахуультай тэмцэх, иргэдийн амьжиргааг дэмжих зэрэг олон талт, төвөгтэй зорилтуудыг түүний Засгийн газар шийдвэрлэх шаардлагатай байна.

Хамцуй шамлан ажиллах энэ цаг мөчид шинэ Ерөнхий сайдын бодлого хэрэгжүүлэх чадамж, манлайлал, зөв зохион байгуулалт, нэгдмэл шийдвэр чухал ач холбогдолтой. Иргэдийн итгэл хүлээлгэж, улс орны хөгжил, тогтвортой байдлыг хангахын төлөөх түүний ажлын амжилт нийгмийн анхаарлын төвд байна.

Г.Занданшатар нь ажлын гараагаа Худалдаа үйлдвэрлэлийн дээд сургуулийн багшаар эхлүүлж, 1995-1998 онд Хөдөө аж ахуйн банканд эдийн засагч, хэлтэс, газрын захирал, 1998-2000 онд Монголбанкны сургалтын төвийн менежер, Хөдөө аж ахуйн банканд Монголбанкны бүрэн эрхт төлөөлөгч, 2000-2003 онд “Хаан” банкны дэд захирал, 2003-2004 онд Хүнс, хөдөө аж ахуйн дэд сайд, 2005-2010 онд МАН-ын дэргэдэх Монголын ардчилсан социалист залуучуудын холбооны Удирдах зөвлөлийн гишүүн, дэд ерөнхийлөгч, ерөнхийлөгч, 2004-2012 онд УИХ-ын гишүүн, 2009-2012 онд Гадаад харилцааны сайд, 2012-2013 онд МАН-ын Ерөнхий нарийн бичгийн дарга, 2013-2015 онд АНУ-ын Стэнфордын их сургуулийн Хөгжил, ардчилал, хуулийн засаглалын хүрээлэнд судлаач, 2016-2024 онд УИХ-ын гишүүн, 2017-2019 онд Монгол Улсын Засгийн газрын гишүүн, Монгол Улсын сайд, ЗГХЭГ-ын дарга, 2019-2024 онд УИХ-ын дарга, 2024 оноос Монгол Улсын Ерөнхийлөгчийн Тамгын газрын даргаар ажиллаж байна.