Монгол Улсын Ерөнхий сайд асан Л.Оюун-Эрдэнэ албан тушаалаасаа огцорсноосоо бүтэн сарын турш төрийн ордны чуулганы танхимд үзэгдсэнгүй. Нөгөөтэйгүүр огцорсон ч улстөр хэвээр хэмээн өөрийгөө тодорхойлдог түүний улс төр дэх идэвхи унтарсныг, нам дотроо туйлын ганцаардсаныг нь харуулж буй.

Чуулганы хуралдаанд суухгүй байгаа Л.Оюун-Эрдэнэ БНСУ-д зорчсон гэх мэдээлэл бий. Итгэл даах тэнхээгүй хэмээн намын ах нар нь нүүр буруулж, хэсэгтээ аниртсан түүний эл үйлдэл улстөрөөс түр зуур хөндийрч, дараагийн алхамдаа бэлтгэж буй гэх тайлбараас эхлээд эрэн сурвалжлагдах ёстой баримтуудаас бултаж буй гэсэн хардлага ч хөвөрч байна.

Төлбөртэй нийтлэл ба гадаад PR

Сүүлийн долоон хоногт Л.Оюун-Эрдэнийн нэр холбогдсон ноцтой асуудал бол The Times дээр гарсан улстөрийн PR нийтлэл байсан юм. Тодруулбал Монгол Улсын Ерөнхийлөгч У.Хүрэлсүхийг ОХУ-ын Ерөнхийлөгч В.Путинтэй ойр харилцаатай, түүний хамтрагч мэтээр нийтлүүлсэн байв. Үүнд нь ч Гадаад харилцааны сайд Б.Батцэцэг хариу тайлбараар няцаалт өгч, Л.Оюун-Эрдэнийг буруутгаад амжсан.

Хэдийгээр энэ нийтлэл хэнээс захиалагдсан нь нууцлаг хэвээр байгаа ч улстөрийн хүрээнд үүнийг Л.Оюун-Эрдэнийн улстөрийн хүрээллийн зүгээс санаачилсан гэх таамаг хөвөрч буй. Тэрээр Ерөнхий сайдын албан тушаалаасаа огцрохын өмнө ч гадаад пи-ар ажилд ихээхэн хэмжээний төсөв зарцуулж байсан түүх бий.

Үүний зэрэгцээ түүнийг огцруулах үйл явцыг тойрсон сөрөг мэдээллүүдийг цахим орчноос устгуулах ажиллагаа явагдаж байна. Тодруулбал нам нь дэмжээгүй, итгэл үзүүлээгүй гэх агуулгатай нийтлэлүүдийг Google, facebook платформууд дээрээс төлбөртэйгөөр устгуулж буй сураг бий.

Хэрэв энэ үнэн бол үг хэлэх, хэвлэн нийтлэх эрх чөлөөнд халдаж, өөрт таалагдаагүй мэдээллийг арилгахын тулд олон улсын платформуудыг ашигласан зохион байгуулалттай ажиллагаа явагдаж байна гэсэн үг. Энэ нь Л.Оюун-Эрдэнэ төрийн бус хувийн ашиг сонирхолд нийцсэн мэдээллийн дархлааг бий болгох гэж буй ноцтой алхам.

Л.Оюун-Эрдэнийн улстөрийн замнал бол Монголын шинэ үеийн популизм, имижийн улс төр хэрхэн өрнөж, бас хэрхэн унтрахыг харуулсан тод жишээ. Гэвч ганц хүнийг шүүмжлэхээс илүүтэй, түүнийг төрүүлсэн улстөрийн соёл, намын зохион байгуулалт, дэмжлэгийн систем, хариуцлага тооцох тогтолцоог ч эргэн харах хэрэгтэй.

Нам нь дэмжээгүй, чуулганд суухгүй байгаа, гадаад PR-д хүч тавьж байгаа нь зөвхөн Л.Оюун-Эрдэнийн улстөрчийн төгсгөл биш, харин Монголын улстөрийн шинэ үеийнхний улстөр хийх аргачлалд суурь өөрчлөлт орох цаг болсоны дохио ч байж мэднэ.