Засгийн газрын Хяналт хэрэгжүүлэх газрын дарга Б.Батцэцэг Холбооны Бүгд Найрамдах Герман Улсын Эдийн засаг, хөгжлийн яамны харьяа Хөгжлийн үнэлгээний хүрээлэнгийн төлөөлөгчид хатагтай Сабине Палмроитер, ноён Дирк Хоффманн нарыг хүлээн авч уулзлаа.

Уулзалтаар хоёр байгууллагын хооронд энэ оны 7 дугаар сард байгуулсан хамтран ажиллах Санамж бичгийг хэрэгжүүлэх эхний алхам болгон, хөгжлийн төсөл, бодлогын үнэлгээний чиглэлээр хоёр өдрийн сургалт, семинар зохион байгуулах талаар тохиролцож, цаашдын хамтын ажиллагааны чиглэлд мэдээлэл солилцлоо.

Өнгөрсөн хугацаанд Засгийн газрын Хяналт хэрэгжүүлэх газар, ХБНГУ-ын Хөгжлийн үнэлгээний байгууллага (DEval) болон Монголын үнэлгээний холбоо хамтран “Монгол Улсын хөгжлийн бодлогын үнэлгээний чадавхын индекс”-ийг тогтоох үнэлгээг амжилттай зохион байгуулж, үр дүнг танилцуулсан.

Монгол Улс Ази тивээс анх удаа энэхүү индексийг тогтоолгож байгаа нь онцлох үйл явдал юм. Энэхүү индекс нь үнэлгээний чадавхын суурь түвшинг тодорхойлж, олон улсын түвшинд хүлээн зөвшөөрөгдсөн арга зүйг нэвтрүүлэх, мэргэжилтнүүдийг бэлтгэх, сургалт, зөвлөмж авах боломжийг бүрдүүлж байгаа юм.

Засгийн газар хөгжлийн бодлогын үр дүнг бодитой үнэлж, цаашдын бодлогоо оновчтой тодорхойлж хэрэгжүүлэхэд анхаарч, Засгийн газрын 2024–2028 оны үйл ажиллагааны хөтөлбөрт “Олон улсын үнэлгээний цогц систем (DME)-ийг хөгжүүлж, бодлогын баримт бичгүүдийн хэрэгжилтийн үнэлгээг боловсронгуй болгох” зорилтыг тусгасан.

Энэхүү индексийг тогтоосноор үнэлгээний тогтолцоог бэхжүүлж, хөгжлийн бодлогын үр дүн сайжирч, улмаар Монгол Улсын гадаад харилцаа, хамтын ажиллагаа өргөжих, дотоод болон гадаадын хөрөнгө оруулалтын таатай нөхцөл бүрдэх ач холбогдолтой юм.