УИХ-ын Ёс зүй дэгийн байнгын хорооны өнөөдрийн хуралдаанаар Д.Ганмаа гишүүний гомдлоор Ж.Чинбүрэнд ёс зүйн хариуцлага хүлээлгэх эсэх асуудлыг хэлэлцсэн. Гэхдээ уг байнгын хороо албан ёсоор ямар нэгэн тогтоол гаргаагүйгээс үзвэл Ж.Чинбүрэнд ёс зүйн хариуцлага хүлээлгэлээ гэж ойлгох боломжгүй юм. Учир нь Б.Баярбаатар байнгын хороо уг асуудлаар тогтоол гаргахгүй, гишүүд хоорондоо ойлголцоод албан бичгээр нэгнээсээ уучлалт гуйхад болох асуудал байна гэж үзсэн. Ж.Чинбүрэн, Д.Ганмаа нар үүнийг хүлээн зөвшөөрсөн юм. 

Эргэн сануулахад Ж.Чинбүрэн нь 2025 оны 10-р сарын 10-нд байнгын хорооны хурал дээр Д.Ганмаа гишүүнийг ‘’Хохино шүү аятайхан байгаарай’’ гэж айлган сүрдүүлсэн байдаг. Ингэж гишүүнийг айлган сүрдүүлсэн, бүрэн эрхэд нь халдсаныг УИХ-ын гишүүн Г.Лувсанжамц гэрчилдэг.  Уг нь Ж.Чинбүрэн сайд ‘’Ёстой тийм зүйл болоогүй’’ гэдэг ч гэрчтэй учраас үнэнээс зугтаж чадаагүй бөгөөд бүтэн сарын дараа УИХ-ын ёс зүйн байнгын хорооны хуралдаанаар Д.Ганмаа гишүүний гомдлыг цайруулсан болж өнгөрөв. Ингэж хэлэхийн учир УИХ-ын гишүүн Б.Баярбаатараар ахлуулсан Ёс зүйн байнгын хороо моральгүй гишүүддээ хариуцлага хүлээлгэж чаддаггүй, толгойг нь илээд өнгөрдгөөс болж,  гишүүд нийгмийн сүлжээгээр хараал хэлж, иргэдээ тавлан доромжилж, чаддаг юм бол эгүүлэн тат гэж тавлаж буй. Хэдийгээр ийм тохиолдолд бүрэн эрхээс нь эгүүлэн татах эрх зүйн боломжгүй ч сануулах, сарын цалингаар нь хувьдах зэрэг сахилгын шийтгэл оногдуулж болно. Гэсэн ч Б.Баярбаатар өнөөдөр Ж.Чинбүрэн, Д.Ганмаа нарыг бие биеэсээ уучлалт гуйгаад эвлэрчих гээд өнгөрүүлчихсэн. Тухайн үед Д.Ганмаа гишүүн тавгүй, бухимдангуй, сэтгэл санааны хямралд орсон байсан бөгөөд хэрвээ Б.Баярбаатарын шийдвэр хангалтгүй гэж үзвэл парламентын дотоод журмаар албан ёсны гомдол гаргаж дахин шалгуулахыг шаардах, хэрвээ айлган сүрдүүлсэн нь эрүүгийн шинжтэй гэж үзвэл хууль хяналтын байгууллагад хандаж, баримтаа олон нийтэд дэлгэн өөрийн байр сууриа хамгаалах эрхтэй.