Ерөнхий сайдын захирамжаар өнгөрсөн наймдугаар сард төрийн өмчит компаниудын Хөгжлийн банк болон арилжааны банкуудаас авсан зээлийн өрийг барагдуулах үүрэг бүхий ажлын хэсэг байгуулагдсан.

1.4 их наяд төгрөгийн өртэй холбоотой ажлын явц

Ажлын хэсэг байгуулагдсанаас хойш Хөгжлийн банк болон Капитал, Үндэсний хөрөнгө оруулалтын банк, Чингис хаан банк зэрэг санхүүгийн байгууллагуудад хуримтлагдсан нийт 1.4 их наяд төгрөгийн чанаргүй зээлтэй холбоотой асуудлыг шийдвэрлэх чиглэлд олон удаагийн хурал, газар дээрх судалгааг хийжээ.

Энэ удаад Засгийн газрын тусгай сангууд болох Эрүүл мэндийн даатгал, Нийгмийн даатгалын хөрөнгүүдэд илүү анхаарч ажилласан бөгөөд тодорхой нааштай үр дүн гарч, ойрын хугацаанд Засгийн газрын хуралдаанд танилцуулах шийдвэрийн төсөл боловсруулагдаж байгаа аж.

“Шинэ яармаг” хороолол

Хөгжлийн банкны 87 тэрбумын зээлтэй холбоотойгоор дутуу баригдсан барилгуудыг Нийслэлийн орон сууцжуулах санд шилжүүлж, гүйцээн барьж орон сууцны хөтөлбөрт хамруулах хувилбар дээр хоёр тал тохиролцсон байна. Энэ нь Нийслэлийн гэр хорооллын дахин төлөвлөлтийн хүрээнд нийцэж буй гэв.

“Гантиг вилла” төсөл

86 тэрбумын асуудалтай энэ төсөл нь 60–90 хувийн гүйцэтгэлтэй байгаагаас гадна зарим хэсгийг Хөгжлийн банк, заримыг нь Капитал банкны асуудлаар компани авчээ. Гэхдээ үнэлгээ нь хэт өндөр байна гэж үзсэн тул Барилгын хөгжлийн төвөөр дахин үнэлгээ хийлгэж, тохиролцох ажил явагдаж байна.

• “Ачлал” хавдрын эмнэлэг

Анх 170 тэрбумаар үнэлэгдэж байсан энэ эмнэлэгт 40 гаруй тэрбумын зээлийн үлдэгдэл бий. Хөрөнгийн эзэнтэй хийсэн хэлэлцээрийн үр дүнд дахин үнэлгээ хийлгэхэд үнэ нь буурсан тул хоёр тал үнэлгээг тохирох асуудлыг хэлэлцэж байгаа.
Эрүүл мэндийн яам эмнэлгийг өөрийн харьяанд авах сонирхолтой ч төсвийн эх үүсвэр байхгүй тул санхүүжилтийг ямар байдлаар шийдэх талаар эрэл хайгуул үргэлжилж байна.