Дэлхийн байгалийн болон соёлын өвийг хамгаалах тухай конвенцод Оролцогч талуудын Ерөнхий Ассамблейн 25 дугаар чуулганы үеэр буюу энэ сарын 24-нд Парис хотноо болсон ЮНЕСКО-гийн Дэлхийн өвийн хорооны гишүүний сонгуульд Монгол Улс нэрээ дэвшүүлэн өрсөлдөж, тус хороонд 2025-2029 онд ажиллах гишүүнээр сонгогдлоо.

ГХЯ-ны мэдээлснээр, тус сонгуульд нээлттэй таван суудлын төлөө 12 улс өрсөлдөж, манай улс 161 улсаас 97-гийнх нь дэмжлэг авснаар Армени, Бангладеш, Чех, Польш Улстай хамт тус хорооны гишүүнээр ажиллахаар болов. Дэлхийн байгалийн болон соёлын өвийг бүртгэх, өвийн обьектуудын хадгалалт, хамгаалалтыг сайжруулах, шаардлагатай хөтөлбөр төслийн санхүүжилтийг шийдвэрлэдэг тус хороонд анх удаагаа гишүүнээр сонгогдсон бөгөөд олон талт идэвхтэй дипломат ажиллагааны үр дүнд олон улсын хамтын нийгэмлэгт Монгол Улсын байр суурийг бэхжүүлсэн түүхэн үйл явдал болов.

Манай улс дээрх конвенцод 1990 онд нэгдэн орсон юм. Соёлын ангиллаар Орхоны хөндийн соёлын дурсгалт газар, Монгол Алтайн нурууны хадны зургийн цогцолбор, Бурхан Халдун ба түүнийг хүрээлсэн тахилгат газар нутаг, Буган хөшөө бүхий хүрлийн үеийн цогцолбор, байгалийн ангиллаар Увс нуурын ай сав газар, Дагуурын тал (ландшафт)-ыг бүртгүүлсэн ба энэ нь тогтвортой аялал жуулчлалыг хөгжүүлэх, түүх соёл, байгалийн үнэт өвийн хадгалалт хамгаалалтыг сайжруулах, археологийн судалгааг нэмэгдүүлэх зэрэгт хувь нэмрээ оруулж байгаа аж.