АНУ-ын Нью-Йорк мужаас харьяалагдах Томпкинс Каунтигийн Эрүүгийн хэргийн шүүх 2025 оны арваннэгдүгээр сарын 24-нд Корнеллын их сургуулийн монгол оюутан Э.Билгүүнд холбогдох хэргийг тангарагтны шүүхээр хэлэлцээд гэм буруутайд тооцох шийдвэр гаргажээ.

Уг хэрэг 2024 оны есдүгээр сарын 1-нд Корнеллын кампуст гарсан бөгөөд мөрдөн шалгалт, урьдчилсан хэлэлцүүлэг зэрэг үйл явц бараг нэг жил гаруй үргэлжилсний эцэст тангарагтны шүүх ийнхүү шийдвэрлэсэн байна.

Шүүхээс Э.Билгүүнийг дараах хоёр үндсэн зүйл ангиар буруутай гэж үзжээ. Үүнд:

• Rape in the First Degree: бие махбодын хувьд эсэргүүцэл үзүүлэх чадваргүй байсан хохирогчтой харилцах замаар хүчингийн гэмт хэрэг үйлдсэн.

• Burglary in the Second Degree:  гэмт хэрэг үйлдэх зорилгоор бусдын орон байранд хууль бусаар нэвтэрсэн.

Прокурорын байгууллага болон шүүхэд бүртгэгдсэн мэдээллээр Э.Билгүүн нь хохирогчийн өрөөнд зөвшөөрөлгүй орж, тухайн үед согтуу эсвэл биеэ хамгаалах чадваргүй байдалтай байсан хохирогчтой бэлгийн харьцаанд орсон гэж үзсэн байна.

Хэргийг эцэслэн шийтгэх шүүх хурлыг 2026 оны хоёрдугаар сарын 24-нд товлосон бөгөөд Нью-Йоркийн хуульд зааснаар нэгдүгээр зэргийн хүчин нь 5–25 жилийн хооронд хорих ялтай. Харин хоёрдугаар зэргийн орон байранд халдсан хэрэг 3.5-аас 15 жилийн ял оноох боломжтой.

АНУ-ын эрүүгийн тогтолцоонд ухаангүй, эсвэл өөрийгөө хамгаалах боломжгүй байдалд байсан хүнийг хүчирхийлэх үйлдэл хамгийн хүнд гэмт хэрэгт тооцогддог. Ийм төрлийн хэрэгт гэм буруутай нь тогтоогдсон этгээд өндөр ял шийтгэлээс гадна насан туршийн гэмт хэргийн бүртгэлтэй болох, зарим мужид заавал бэлгийн гэмт хэрэгтний бүртгэлд хамрагдах зэрэг ноцтой үр дагавартай тулгардаг байна.