УИХ-ын гишүүн С.Цэнгүүн 22 удаагийн гадаад томилолттой байсныг тойрсон асуудлаар тодруулга өглөө. Түүний хэлснээр, энэ оны хувьд олон улсын байгууллагуудаас ирсэн урилгууд олширсон тул гадаад ажил хариуцсан томилолт ихэвчлэн давхцсан байна. Ийнхүү хийсэн томилолтууд нь УИХ-ын Тамгын газрын төсвөөс бус, тухайн байгууллагуудын урилгаар зохион байгуулагдсан гэв.

Хамгийн залуу гишүүнээр сонгогдсон тэрбээр Залуу парламентчдын сүлжээ, Эмэгтэй парламентчдын холбоо болон залуу улс төрчдийн хөтөлбөрүүдэд идэвхтэй оролцож буй. Түүний мэдээлснээр, 15 орны эмэгтэй парламентачид жил бүр тодорхой сэдвийн хүрээнд өөр өөр улсад ажилладаг бөгөөд ирэх жил Монголд айлчлах хүсэлтээ илэрхийлсэн байна. Энэ нь баталгаажвал өөрөө мөн оролцох боломжтой гэдгийг тэр дурдав.

С.Цэнгүүн “Урилгаар очсон арга хэмжээнд би заавал илтгэл тавих эсвэл гол хэлэлцүүлэгт оролцох шаардлагатай гэж үздэг. Олон нийтэд нээлттэй ажиллах үүргийн хүрээнд гурван сар тутам Facebook хуудсаараа ирц, томилолт болон оролцсон уулзалт, илтгэлүүдийнхээ талаар тайлан гаргадаг. Өнгөрсөн арванхоёрдугаар сард жилийн нэгдсэн тайлангаа нийтэлсэн” хэмээлээ.

Нөгөө талаар, УИХ 126 гишүүнтэй болсонтой холбоотойгоор улсын төсвөөс гарах томилолтын зардал нэмэгдэж буй нь анхаарал татаж байна. 2025 онд гадаад томилолтод зориулан 2 орчим тэрбум төгрөг тусгаснаас эхний хагас жилд бараг 1.7 тэрбумыг зарцуулсан нь шүүмжлэл дагуулсан юм.

Хагас жилийн байдлаар томилолтын тоогоор

• С.Цэнгүүн – 22 удаа,

• А.Ундраа – 19 удаа,

• Д.Цогтбаатар – 18 удаа,

• Ч.Номин – 16 удаа,

• Д.Энхтуяа – 12 удаа,

• Ж.Чинбүрэн – 10 удаа,

• Б.Пүрэвдорж – 9 удаа,

• Р.Сэддорж – 8 удаа
  гадаад томилолттой байжээ.