МАН мэдрэмжээ бүр алджээ. Энэ янзаараа 2028 оны сонгуулиар ёстой “”үсгүй хусуулах” үрээ тарьж байна.  Төсөв мөнгө хүрэхгүй, байхгүй гэчихээд томилгоо тэлж,  төрийн бүтэц толгойгоо даахгүй сульдаатай хүүхэд лүгээ болтлоо данхайж байна.

100 жилийн настай намд төр, засгийн бодлогын залгамж халаа гэж байхгүй нь нэн харамсалтай. Хөгжлийн стратеги,  бодлогын  залгамж  гэх мэт том, сайхан зүйл ярихаа болъё. Өчигдөр шийдсэн зүйлээ өнөөдөр буцааж байгаа тухай л хэлэлцэе.

Дэд сайдуудыг болилоо гэсэн, хуурч байгаад дахин томиллоо.

Мэргэжлийн хяналтын байгууллагыг татан буулгасан одоо дахин байгуулна гэнэ. 21 аймагт нэгжтэй, 400 гаруй албан хаагчтай, Хадны мангаа хочтой  нүсэр байгууллага байсан. Одоо салбаруудад нь харьяалуулсан  нь илүү оновчтой бас мэргэжлийн хандлагатай болсон.  Гэтэл нийлүүж, нэгтгээд дахин төрийн хяналтын нүсэр систем бий болгохоор ярьж эхэллээ. Өөрөөр бол засаг төрийн бодлого тухай тухайн үеийн  хүнээр, багаар, цаашдаа бол бизнесийн бүлэглэлээр овоглогдох нь  ээ.

Хяналтыг ард иргэдэд, улс төрийнх хэллэгээр бол сонгогчиддоо үлдээчих.  Чанар, үйлчилгээ, стандарт гэх мэтийг Өрсөлдөөнд нь үлдэээчих. Зах зээлийн зарчмаар нь явуулчих. Төр бүгдийг хянадаг, бизнес хийдэг боллоо, МАН муухай байна, тоталитар систем рүү орох нь гэж сүүлийн жилүүдэд ярих болсон. Мэдрэмжээ алдлаа гэх үг  үнээ барж, харин яг тийм тогтолцоо, үг хэллэгт дасгах тактик явагдаж эхлэв үү.

Дарангуйлалд дасдаг байж таарахгүй. Тэр  үе  өнгөрч,  шинэ цаг  ирсэн гэдгийг хэзээ ойлгох юм  бол. Дараа, дараагийн сонгуулиуд  л сургах шинжтэй боллоо.  

                                                                                                                                   Б.УУГАН