Нийслэлийн Татварын газрын харьяа дүүргийн дарга нар чөлөө зөвшөөрөлгүй гадаадад аяллаар явсан талаар салбарын сайд нь шүгэл үлээв. Шүгэл л юмдаа, дотроо яриад шийдээгүйг бодоход. Цаашилбал  нийслэл гэж улс дотор улс буй болсныг гэрчлэв. Оны зааг дээр компаниуд дансаа хаалгаж, татвар бүрдүүлэлтийн  ид цаг дор, нийслэл гэж их айлын татварын дарга нар Дубайд зугаалж явах үнэхээр зохимжгүй, асар ёс зүйгүй үйлдэл болжээ. Төсвөө бүрдүүлэх гэж Сангийн сайд хийгээд салбарынхан үгээ хэлж байхад, ажил алба, алив юманд чинь сэтгэл гэж нэг юм байна даа. Яаж яг ийм цагт идэж уугаад, инээж ханиагаад, наранд шараад хэвтэж байгаа бол гэх дүр зураг. Төрийн албан хаагч гэж туж нүдүүлж байх ёсгүй. Гэхдээ жирийн нэг татварын байцаагч нар биш баахан хурган дарга нар явсанд эгдүү хүрч байна.

Нийслэлийн ИТХ-ын дарга А.Баяр гэж нэг л олон бараа бологч дагуулан алхсан эрхэмсэг нэгэн.   Засаг дарга Х.Нямбаатар гэж хавьтсан ойртсоноо хяргахаа шахан загнаж явдаг нэгэн. Шүүмжилсэн хүн бүрийг улстөрийн захиалгатай гэнэ. Нийслэлээр овоглогдсон байгууллагуудын энэ мэт үйлдэл  Улс дотор Улс байгуулсны жишээ шүү. Намайг хэн хэлж, нохой хэн саахав гэдэг байдлаар аяглах болсныг харж удлаа, тэсэж тэвчлээ.

Зугаалагч дарга нарыг ирэхээр  хэрхэн хариуцлага тооцохыг харъя. Татвар, гааль гэх мэт салбарын сайд дарга нар нь дийлэхээ больсон, улс төрийн бүлэглэлүүдийн  газар гэж олон жил нэрлэгдсэн. Гэхдээ хэмжээ хязгаар бий шүү.

                                                                                           Б.Зөөлөн