Улсын дээд шүүхийн Шүүгчдийн зөвлөгөөн 2026 оны зургаадугаар сарын 3-ны өдөр хуралдаж, тус шүүхийн Ерөнхий шүүгчийг сонгох асуудлыг хэлэлцэн шийдвэрлэлээ.

Хуралдаанаар Улсын дээд шүүхийн Ерөнхий шүүгчийн албан тушаалд Эрүүгийн хэргийн танхимын тэргүүн, шүүгч Ч.Хосбаяр болон Захиргааны хэргийн танхимын шүүгч Ц.Цогт нар нэр дэвшсэн байна. Санал хураалтын дүнд шүүгч Ц.Цогт шүүгчдийн олонхын дэмжлэгийг авч, түүнийг Улсын дээд шүүхийн Ерөнхий шүүгчээр томилуулах тухай саналыг Монгол Улсын Ерөнхийлөгчид өргөн мэдүүлэхээр тогтжээ.

Цэндийн Цогт нь 1975 онд Архангай аймгийн Цэцэрлэг суманд төрсөн бөгөөд өдгөө 51 настай. Тэрбээр 1994–1998 онд Монгол Улсын Их Сургуулийн Хууль зүйн сургуулийг эрх зүйч мэргэжлээр төгсөж, эрх зүйн бакалаврын зэрэг хамгаалсан. Мөн 2007 онд АНУ-ын Уилламетте их сургуулийн Хууль зүйн коллежид суралцан хууль зүйн ухааны магистрын зэрэг эзэмшсэн бөгөөд хууль зүйн ухааны доктор зэрэгтэй.

Түүний шүүхийн байгууллагад ажилласан туршлага 1998 оноос эхэлдэг. Тухайн онд Улсын дээд шүүхийн Эрүүгийн хэргийн танхимд нарийн бичгийн дарга, шүүгчийн туслахаар ажиллаж байсан бол 2004–2011 онд Нийслэлийн Захиргааны хэргийн шүүхийн шүүгчээр ажилласан. Улмаар 2011–2013 онд Захиргааны хэргийн давж заалдах шатны шүүхийн ерөнхий шүүгч, 2013–2020 онд тус шүүхийн шүүгчээр ажиллаж, 2020 оноос Улсын дээд шүүхийн шүүгчийн албан тушаалыг хашиж байна.

Түүний хамгийн сүүлд мэдүүлсэн хөрөнгө, орлогын мэдүүлэгт өөрийн жилийн орлого 109 сая төгрөг, гэр бүлийн орлого 36 сая төгрөгөөр бүртгэгджээ. Мөн хоёр орон сууц эзэмшдэг бөгөөд нийт үнэлгээ нь 276 сая төгрөг байна. Үүнээс гадна 5.7 сая төгрөгийн үнэлгээ бүхий газартай, 150 сая төгрөгийн зээлийн үлдэгдэлтэй гэж мэдүүлсэн байна.