Украин улс аравдугаар сарын 15-нд ОХУ-ын Рязань муж дахь “Роснефть” компанийн газрын тос боловсруулах үйлдвэрт цохилт өгчээ. Энэ нь эрчим хүчний байгууламжид харилцан цохилт өгөхгүй байх тохиролцоо алдагдсаны дараах үйл явдал юм. 

ОХУ-ын газрын тос боловсруулах үйлдвэрүүдэд чиглэсэн Украины довтолгоонууд тус улсын шатахууны үйлдвэрлэл, экспортод дарамт учруулж байна. Олон улсын эрчим хүчний агентлагийн мэдээллээр ОХУ-ын газрын тос боловсруулах хэмжээ 2026 оны зургадугаар сард сүүлийн 20 гаруй жилийн хамгийн доод түвшинд хүрч, бензин болон дизелийн түлшний үйлдвэрлэл өмнөх оноос буурчээ. 

-Тэгвэл энэ нь манай улсад хэрхэн нөлөөлөх вэ?

Монгол Улс шатахууныхаа дийлэнх хэсгийг ОХУ-аас импортолдог. Тиймээс Оросын газрын тос боловсруулах үйлдвэрлэл доголдох, экспортын хязгаарлалт үргэлжлэх, нийлүүлэлтийн зардал нэмэгдэх нь Монголын шатахууны зах зээлд шууд нөлөөлөх эрсдэлтэй.

Тухайлбал, импортын үнэ өсвөл дотоодын шатахууны жижиглэнгийн үнэ нэмэгдэх дарамт үүсэж болно. Шатахууны үнэ өсөх нь тээвэр, уул уурхай, хөдөө аж ахуй, бараа бүтээгдэхүүний тээвэрлэлтийн зардлаар дамжин өргөн хэрэглээний барааны үнэд нөлөөлөх боломжтой.

Монгол Улс 2026 оны аравдугаар сарын 12-ноос АИ-92 бензиний үнийг литр тутамд 500–550 төгрөгөөр нэмэгдүүлсэн талаар мэдээлсэн. Үүнд ОХУ-аас нийлүүлж буй шатахууны импортын үнэ өссөн нь голлон нөлөөлсөн гэж салбарын албаныхан тайлбарлажээ.