Хууль дээдлэх ёс, шударга ёсны төлөөх арван жилийн үйлс Монгол Улсад хууль дээдлэх ёсыг бэхжүүлж, иргэн, хуулийн этгээдийн эрх, хууль ёсны ашиг сонирхлыг хамгаалах эрхэм зорилгын хүрээнд үйл ажиллагаа явуулж ирсэн “Заргач Зараа” хязгаарлагдмал хариуцлагатай нөхөрлөл үүсэн байгуулагдсаны 10 жилийн ойтойгоо золгож байна.

Арван жилийн замнал бол мэдлэг, туршлага, итгэлцэл, хариуцлага, хөдөлмөр зүтгэлээр бүтсэн үнэ цэнтэй түүх юм. Манай нөхөрлөл байгуулагдсан цагаасаа хууль зүйн бүхий л чиглэлээр мэргэжлийн зөвлөгөө, туслалцаа үзүүлж, иргэн, аж ахуйн нэгж, байгууллагын эрх ашгийг хамгаалан, хууль ёсны шийдэлд хүрэхэд нь дэмжлэг үзүүлж ирлээ.

Хууль зүйн ажил нь зөвхөн хууль, заалтыг хэрэгжүүлэхээс гадна хүний эрх, итгэл найдвар, шударга ёс, хариуцлагыг эрхэмлэх онцгой үүрэгтэй. Тиймээс бид мэргэжлийн ёс зүй, зарчимч байр суурь, үйлчлүүлэгчийн итгэлийг үйл ажиллагааныхаа үндсэн үнэт зүйл болгон ажилладаг. Өнгөрсөн арван жилийн ололт амжилт, хуримтлуулсан туршлага нь хамт олны маань хичээл зүтгэл, үйлчлүүлэгчдийн итгэл, харилцагчдын дэмжлэг, мэргэжил нэгт нөхдийн хамтын ажиллагааны үр дүн билээ. Ойн баярыг тохиолдуулан бидэнд итгэл хүлээлгэн хамтран ажилласан нийт үйлчлүүлэгч, харилцагч, хамтран зүтгэгчид болон үе үеийн хамт олондоо чин сэтгэлийн талархал илэрхийлье.

Цаашид ч бид хууль дээдлэх ёс, мэргэжлийн ур чадвар, үйл ажиллагааны чанараа эрхэмлэн, иргэн, байгууллага бүрийн хууль ёсны эрх ашгийг хамгаалах, шударга ёсыг бэхжүүлэх үйлсэд хувь нэмрээ оруулан ажиллах болно. Өнгөрсөн арван жил бол бидний бүтээсэн замнал, өнөөдөр бол бидний бахархал, ирэх арван жил бол шинэ зорилго, амжилтын эхлэл юм. “Заргач Зараа” ХХН-ийн хамт олон болон бидэнтэй хамтран ажиллаж ирсэн нийт харилцагч, үйлчлүүлэгч та бүхэндээ 10 жилийн ойн баярын мэнд хүргэж, эрүүл энх, аз жаргал, ажил үйлсийн өндөр амжилт хүсэн ерөөе!

    Хүндэтгэсэн, “Заргач Зараа” ХХН-ийн захирал З. Ариунжаргал