АНУ-ын Ерөнхийлөгч Дональд Трамп Илон Масктай холбоотой маргааны дараа Украинд үзүүлж буй Starlink интернэт үйлчилгээний ажиллагааг сэргээсэн гэж мэдэгджээ.

Өмнө нь Украины Ерөнхийлөгч В.Зеленский цэргийн зориулалттай Starshield сүлжээний холболт бүрэн хэвийн болоогүйг мэдээлсэн юм. Харин The Wall Street Journal сонинд Трамп Масктай утсаар ярьж, үйлчилгээний хурдыг сэргээхийг хүссэн гэж мэдээлжээ.

Starlink-ийн хурдны хязгаарлалт нь Украины армийн дрон ашиглан довтлох болон агаарын довтолгооноос хамгаалах чадварт сөргөөр нөлөөлсөн байна. Зеленский системийн ажиллагааг бүрэн сэргээхээр ажиллаж байгаагаа мэдэгдсэн ч Трамп Илон Масктай ярьсан эсэх талаар тодорхой хариулт өгөөгүй бөгөөд “Хамгийн гол нь тэр үйлчилгээг хэвийн болгосон” гэжээ.

Маск цэргийн зориулалттай Starshield системд хандах эрхийг АНУ-ын Засгийн газар хянадаг гэж мэдэгдсэн бол Цагаан ордон үйлчилгээний хязгаарлалт тогтоох тушаал өгөөгүй хэмээн үгүйсгэсэн байна.

Энэ асуудал Трамп Украиныг Оросын газрын тос боловсруулах үйлдвэрүүд рүү довтлохоо зогсоохыг шахаж байсан үетэй давхацсан бөгөөд Starlink-ийн хязгаарлалт Украины цэргийн ажиллагаанд хэрхэн нөлөөлсөн талаарх маргааныг улам хурцатгажээ.