Шөнийн цахилгааны хөнгөлөлт арваннэгдүгээр сарын 1-нээс эхэлнэ

Цахилгааны төлбөрийн үлдэгдэлгүй, цагийн ялгаварт тоолууртай гэр хорооллын өрхүүд өвлийн улиралд шөнийн цахилгааны тарифын хөнгөлөлт эдэлнэ. Хөнгөлөлт ирэх оны дөрөвдүгээр сарын 1 хүртэл үргэлжилнэ.

Гэр хорооллын айл өрхийн цахилгаан эрчим хүчний хэрэглээний зардлыг бууруулж, агаарын бохирдлыг багасгах зорилготой шөнийн тарифын хөнгөлөлт энэ оны арваннэгдүгээр сарын 1-нээс хэрэгжиж эхлэх гэж байна. Уг зохицуулалт 2017 оноос хэрэгжиж байгаа бөгөөд нийслэл, аймгийн төв болон 10 мянгаас дээш хүн амтай сум, суурингийн шаардлага хангасан өрхүүдэд хамаарна. 

Цахилгааны хэрэглээг хэдэн хувиар хөнгөлөх вэ?

Эрчим хүчний зохицуулах хорооны 2025 оны арванхоёрдугаар сарын 25-ны өдрийн 703 дугаар тогтоолд зааснаар шөнийн тарифын хөнгөлөлтийг сүлжээний хүчдэл болон хэрэглээний хэмжээнээс хамааруулан тооцно. 

• 220 В-ын сүлжээ: Сард 1,500 кВт.ц хүртэлх шөнийн хэрэглээний тарифыг 100 хувь хөнгөлнө.

• 380 В-ын сүлжээ: Сард 3,000 кВт.ц хүртэлх шөнийн хэрэглээний тарифыг 100 хувь хөнгөлнө.

• Тогтоосон хэмжээнээс давсан хэрэглээ: Хэтэрсэн хэсгийн тарифыг 50 хувиар хөнгөлнө.

Хөнгөлөлтөд зөвхөн оройн 21:00 цагаас өглөөний 09:00 цаг хүртэл хэрэглэсэн цахилгаан хамрагдах юм. Өдрийн хэрэглээнд энэхүү шөнийн хөнгөлөлт үйлчлэхгүй.

Ямар шаардлага хангасан байх вэ?

Шөнийн тарифын хөнгөлөлтөд хамрагдах өрхүүд дараах нөхцөлийг хангасан байна.

• Цахилгааны төлбөрийн үлдэгдэлгүй байх.

• Цагийн ялгаварт тарифт тоолууртай байх.

• Цахилгааныг зөвхөн ахуйн хэрэгцээнд болон өөрийн байнга оршин суудаг гэр, сууцаа халаах зориулалтаар ашиглах.

• Цахилгаан хэрэгсэл, тоноглолын аюулгүй ажиллагааг хангах.

Эдгээр шаардлагыг хангаагүй тохиолдолд хөнгөлөлт эдлэх боломжгүй байж болох тул айл өрхүүд цахилгааны төлбөрийн үлдэгдэл, тоолуурынхаа төрлийг урьдчилан шалгах нь зүйтэй.

Өвлийн цахилгааны зардлаа бууруулах боломж

Хүйтний улиралд гэр, сууцаа цахилгаанаар халаадаг өрхүүдийн хувьд шөнийн тарифын хөнгөлөлт нь өрхийн зардлыг бууруулах ач холбогдолтой. Гэхдээ хөнгөлөлт нь цахилгааны нийт хэрэглээнд бус, тогтоосон цагийн хүрээнд ашигласан хэрэглээнд тооцогдохыг анхаарах хэрэгтэй.

Иймд иргэд цахилгааны төлбөрөө хугацаанд нь төлж, шаардлага хангасан тоолуур ашиглан, шөнийн хэрэглээгээ зөв тооцсоноор хөнгөлөлтөд хамрагдах боломжтой.