Дархан-Уул аймгийн Дархан сумын 12 дугаар байрны 14 дүгээр байрны долдугаар давхарт энэ сарын 21-ний өдөр газ дэлбэрч гурван хүн гэмтэж олон арван айл өрх гэр оронгүй болсон билээ. . Ослын газарт мэргэжлийн багийнхан ажиллаж урьдчилсан байдлаар дүгнэлт гаргаж мэдээлэл хийсэн юм. Одоогийн байдлаар дэлбэрэлт болсон байрны айл өрхийг дотуур байр цэцэрлэгийн байранд байршуулаад байгаа юм.  Уг барилгын оршин суугчид байрандаа орж болох эсэхийг Барилгын техникийн хяналтын улсын ахлах байцаагч Ш.Уранчимэгээс тодрууллаа. -Ослын дүгнэлт урьдчилсан байдлаар гарсан уу? - Осолд өртсөн байранд нуралт үүссэн. Тиймээс тулгуур бэхэлгээ хийсэн байгаа. Анх очиход хавтан нурвал барилга тэр чигтээ нурах нөхцөл бүрдсэн байсан. Одоо барилгад хүн амьдрах боломжтой эсэх асуудлыг ярих боломжгүй. Барилгын тухай хуулийн заалтыг зөрчсөн учир актлаад байна. Цаашдаа үзлэг шинжилгээ хийнэ, аль давхарт ямар цууралт үүссэн, аль хавтанг буулгах уу, алийг нь бэхлэх үү гэдэг асуудлыг шийднэ.   -Хохирлын хэмжээг тогтоосон уу? -Шинжилгээний эцсийн дүгнэлт гарсны дараа л хохирлын хэмжээ тодорхой болно. Тус байрны 26 тоотод суух айл “Дашваанжил” компаниас өөрсдөө очиж, таван литрийн баллонтой хоёр ширхэг хийн түлш худалдаж аваад нэгийг нь хэрэглэж, нөгөөг нь хадгалж байжээ. Тухайн өдөр хэрэглээгүй байсан таван литрийн баллонтой хийн түлш дэлбэрсэн байна. Мэргэжлийн хүмүүсийн анхан шатны шалгалтаар “Дашваанжил” ХХК  хийн баллоныг мэргэжлийн хүнээр өөрсдөө хүргэж өгөөгүй, хийн баллоныг орон сууцны хоёроос дээш давхарт байрлуулахыг хориглох журмыг зөрчсөн, дэлбэрсэн хийн баллон нь ашиглалтын хугацаа заасан бичиг, тэмдэглэгээгүй зэрэг зөрчил илэрчээ. Одоогийн байдлаар дэлбэрэлт болсон байранд хүн амьдрах боломжгүй гэсэн дүгнэлт гаргаж, акт тогтоожээ.