Өмнөговь аймгийн Цогтцэций сумын нутагт байрлах Тавантолгой ХК-ийн  тосгоны ажилчдын байрны хажууд  байрлуулсан усан оргилуурын  дэргэд  тоглож байсан 10 настай А.Зоригтбаатар, гурван настай Г.Золбаяр нар тогонд цохиулж  нас барсан хэрэг өнгөрөгч оны наймдугаар сард гарч байсан юм. Гэтэл уг хэргийг шалгасан мөрдөн байцаагч талийгаачдыг амиа хорлосон гэсэн үндэслэлээр хэргийг нь хаасан байна.  Тиймээс осолдож нас барсан хүүхдүүдийн эцэг эх Э.Ганчулуун, А.Алтанчимэг нар эрхээ хамгаалуулахаар хүний эрхийн хуульч М.Ичинноров нарт хандсан аж. Хэргийн талаар сануулбал  осол гарсан өдөр компанийн жижүүр усан оргилуурын усанд тогтой байгааг диспетчерт мэдээлсэн боловч аюулаас зайлсхийх арга хэмжээг аваагүй юм байна. Түүнчлэн Тавантолгой компаниас дээрх  усан оргилуурыг суурилуулахдаа барилга байгууламж болон цахилгаан холболтын схем зураггүй ажлыг  хийж гүйцэтгэжээ. Мөн цахилгаан гэрэлтүүлэг, цахилгааны лент, цахилгааны утас, шахах насос зэрэг нь гарал үүслийн гэрчилгээгүй гэсэн мэргэжлийн байгууллагын дүгнэлт гарсан байна. Мэргэжлийн байцаагчийн дүгнэлт гарсаар байтал талийгаач хоёр хүүхдийг амиа хорлосон гэж  тус аймгийн Цагдаагийн хэлтсийн мөрдөн байцаагч нар үзсэн нь хувийн сонирхол байсан гэж ар гэрийнхэн нь хардаж эрхээ хамгаалуулахаар ийн өмгөөлөгч нарт ханджээ. Н.Бүжин