Монголбанкнаас экспортолсон алтны сорьцыг өөрчилсөн хэрэгт холбогдсон  Монголбанкны Валютын газрын Эрдэнэсангийн нягтлан бодогч С.Цагаанхүү нарт таслан сэргийлэх арга хэмжээ аваад нэг сарын хугацаа өнгөрч буй. Тэднийг  Эрүүгийн хуулийн 148.4 дахь хэсэгт зааснаар буюу бүлэглэн залилангийн хэрэг үйлдсэн хэрэгт  сэжигтнээр тооцон шалгаж байгаа аж. Сэжигтнүүдийг тусгаарлаж, мөрдөн байцаалт явуулах шаардлагатай гэсэн  шүүхийн захирамжийн дагуу  С.Цагаанхүү нарыг Цагдан хорих төвд хорих хугацааг дахин нэг сараар сунгасан юм. Эх сурвалжийн мэдээллээр төв банкнаас экспортолсон алтны сорьц нь дэлхийн зах зээл дээр  чанартаа хүрэхгүй дутсан зөрчил илэрсэн учраас тус банкнаас сорьц дутсан асуудлыг шалгуулах хүсэлтийг Прокурорын газарт тавьжээ. Уг хүсэлтийн дагуу хууль хяналтынхан мөрдлөгө явуулж  дээрх дөрвөн хүнийг сэжигтнээр татан шалгаж эхэлсэн байна. Эрүүгийн хуулийн тусгай ангийн 148.4-т  "Энэ гэмт хэргийг онц аюултай гэмт хэрэгтэн, зохион байгуулалттай бүлэг, гэмт бүлэглэл үйлдсэн, түүнчлэн энэ хэргийн улмаас онц их хэмжээний хохирол учирсан бол эд хөрөнгийг хурааж,  арваас дээш арван таван жил хүртэл хугацаагаар хорих ял шийтгэнэ" гэж заажээ. Н.Бүжин