2008 оны долдугаар сарын 1-ний үймээний үеэр галт зэвсэг хэрэглэсэн хэрэгт тухайн үеийн цагдаагийн дарга нарыг холбогдуулан шалгасан билээ.  Тэдний шүүх хурал өнөөдөр 14 цагаас Сүхбаатар дүүргийн шүүхэд болох гэж байна. Шүүх хуралд хохирогч нарыг төлөөлж Ц.Энхбаяр оролцох бол  Цагдаагийн ерөнхий газрын даргын үүрэг гүйцэтгэгч асан, хошууч генерал Ч.Амарболд, нийслэлийн Цагдаагийн газрын даргын үүрэг гүйцэтгэгч Д.Зоригт, Хэв журмын хэлтсийн дарга асан, хурандаа Ш.Батсүх нар өөрсдөө оролцох аж. Тэднийг холбогдох 21147006 дугаартай эрүүгийн хэрэгт Монгол Улсын Эрүүгийн хуулийн Ерөнхий ангийн 35 дугаар зүйлийн 35.5 буюу гэмт хэрэгт хамтран оролцож гардан гүйцэтгэсэн,  274 дүгээр зүйлийн 274.2 буюу Монгол Улсын иргэн зэвсэгт хүчин, бусад цэрэгт, цэргийн үүрэгтэн дайчилгаа, сургууль, цугларалтын үед цэргийн алба хаах талаар хуулиар тогтоосон журмыг зөрчиж энэ бүлэгт заасан гэмт хэргийг үйлдсэн гэсэн үндэслэлээр ял төлөвлөснийг ийн анхан шатны шүүхээр хэлэлцэх юм байна. Хэрэв тэдний гэм буруу нь шүүхээр тогтоодвол 5-10 жилийн хорих ялаар шийтгүүлнэ. Шүүх хурлыг Ч.Хосбаяр даргалах аж.