2008 оны долдугаар сарын-1-ны үймээний үеэр таван хүн амь үрэгдсэн хэрэгт Цагдаагийн ерөнхий газрын даргын үүрэг гүйцэтгэгч асан, хошууч генерал Ч.Амарболд, нийслэлийн Цагдаагийн газрын даргын үүрэг гүйцэтгэгч Д.Зоригт, Хэв журмын хэлтсийн дарга асан, хурандаа Б.Ганбаатар, Эргүүл хамгаалалтын газрын дарга хурандаа Ш.Батсүх нарыг маргааш Сүхбаатар дүүргийн шүүхэд 09.30 цагт шүүнэ.

Уг шүүх хуралд 2008 онд ҮАБЗ-ийг тэргүүлж байсан Н.Энхбаяр, Ерөнхий сайд асан С.Баяр нар гэрчээр оролцоно. Тэдэнд холбогдох хэргийг цагдаагийн албан хаагчдын хэргээс тусгаарлаж прокурорын хяналтын шатнаас шүүх рүү шилжүүлсэн.

Тэдэнд холбогдох 21147006 дугаартай эрүүгийн хэрэгт Монгол Улсын Эрүүгийн хуулийн Ерөнхий ангийн 35 дугаар зүйлийн 35.5 буюу гэмт хэрэгт хамтран оролцож гардан гүйцэтгэсэн гэсэн зүйлчлэлээр яллагдагчаар татсан билээ.

Түүнчлэн Эрүүгийн хуулийнТусгай ангийн 274 дүгээр зүйлийн 274.2 буюу Монгол Улсын иргэн зэвсэгт хүчин, бусад цэрэгт, цэргийн үүрэгтэн дайчилгаа, сургууль, цугларалтын үед цэргийн алба хаах талаар хуулиар тогтоосон журмыг зөрчиж энэ бүлэгт заасан гэмт хэргийг үйлдсэн гэсэн үндэслэлээр буруутгажээ.

Мөн 294 дүгээр зүйлийн 294.2 дахь хэсэгт зааснаар захирагч эрх мэдэл албан тушаалын байдлаа урвуулан ашигласан гэсэн үндэслэлээр прокуророос ял төлөвлөж өнгөрөгч хоёрдугаар сарын 2-ны өдөр Сүхбаатар дүүргийн шүүх рүү шилжүүлсэн юм.