-80-аас дээш сая төгрөгийн байрнаас өөр сонголтгүй “100 мянган айлын орон сууц” иргэдийг чирэгдүүлж байна-

Засгийн газраас хэрэгжүүлж буй “100 мянган айлын орон сууц” хөтөлбөрт хамрагдах хүсэлтэй иргэдийн эхний хэсгийн өргөдлийг ОССК өчигдрөөс хүлээн авч эхэлсэнтэй холбоотойгоор барилгын компаниуд, ОССК, УБМТ зэрэг байгууллагууд хөл хөдөлгөөн ихтэй байлаа.   Иргэдийг өргөдөл авч эхэлсэн өдөр байрнууд захиалгаа аль хэдийнэ аваад дууссан байлаа Манай сурвалжлах хэсэг өчигдөр ЗТБХБЯ-ны хэрэгжүүлэгч агентлаг  Газрын харилцаа, геодизи, зураг зүйн газраас гаргасан өнөөдрийн байдлаар 50-иас дээш хувийн гүйцэтгэлтэй байгаа уг хөтөлбөрт хамрагдсан гэх 14 барилгын компаниас сонгож мөн ОССК дээр ямархуу дүр зураг бий болж буйг тандахаар зорьсон юм. Бидний очсон эхний газар бол “100 мянган айлын орон сууц” хөтөлбөрт хамрагдсан хамгийн хямд байр буй  Хан-Уул дүүргийн IV хороо буюу бидний нэрлэж заншсанаар Яармагийн гүүрний хойд талд байрлах “Пума” ХХК-ийн барьж буй “Шинэ гэр” төслийн байр байсан юм. 20-54 метр квадрат бүхий талбайтай уг байрны үнэ хэмжээнээсээ хамаараад 25 сая төгрөгнөөс дээш үнэтэй байсан юм. Энэ үнийн дүнд айлд хэрэгцээтэй бүхий л тавилга багтсан бөгөөд үнийн хямд бодлого барьсан гэдгээрээ олны анхаарлыг хамгийн ихээр татаж байсан боловч ОССК уг хөтөлбөрт хамрагдах хүсэлтэй анхны иргэнийхээ хүсэлтийг хүлээн авсан өдөр уг орон сууцны бүх захиалга дууссан гэх мэдээллийг борлуулалтын менежер бидэнд өгч байлаа. 100 мянган айлын орон сууцнаас сонгохыг хүссэн иргэдэд 80 гаруй сая төгрөг хэрэгтэй Тиймээс бид  дараагийн хотхон руу буюу тус дүүргийн XV дугаар хороолол буюу Төв цэнгэлдэх хүрээлэнтэй зэрэгцэн сүндэрлэх “Рапид” харш дээр ирсэн юм. Хотын “А” зэрэглэлийн бүс дэх уг тохилог хороолол мөн л аль хэдийнэ захиалгаа аваад дууссан байв. Барилгын компанийнхан “Дараагийн барилга маань ирэх дөрөвдүгээр сараас эхлэнэ. Эхний ашиглалтад орсон байрнууд маань метр квадрат нь 1.6 сая төгрөгийн үнэтэй байсан. Ирэх дөрөвдүгээр сараас эхлэх барилга маань энэ үнэнээс бага зэрэг нэмүү үнэтэй байх төлөвтэй байна. Энэ барилга 2013 оны дөрөвдүгээр улиралд ашиглалтад орно. Уг байрыг “100 мянган айлын орон сууц” хөтөлбөрийн тавьж буй шаардлага болох 55 метр квадратаас доош талбайтай байхаар тооцоолон барьж байгаа. Энэ орон сууцнаас 55 метр квадраттай байр худалдан авахад хамгийн багаар тооцоолоход 80 гаруй сая төгрөг шаардагдана” гэв. Бидний зүгээс Засгийн газрын зүгээс хямд орон сууцаар иргэдийг хангах зорилт тавьж, уг хөтөлбөрийг хэрэгжүүлж байгаа. Тиймээс уг байрны урьдчилгаа төлбөр болон байрны зөрүү болох 30 гаруй сая төгрөгийг бага, дунд орлоготой иргэд барагдуулах боломж хомс. Ямар шалтгаанаар орон сууцны үнэ ийм байдлаар өндөр байгааг тодруулахад “Өнгөрсөн жил 130 төгрөг байсан тоосго энэ жил үйлдвэрлэгчдээс 310 төгрөгөөр бидэнд ирж байна. Мөн блокноос эхлээд барилгын материалын үнэ өндөр байгаа. Энэ үнийг Засгийн газраас барих талаар хөндөж байсан. Гэхдээ л буцаагаад хуучин үнэнд нь аваачих боломжгүй. Тоосгоны үнийг хүчээр буулгалаа л гэхэд 250 төгрөг болгоно байх. Ийм байдлаар барилгын материалын үнэ өндөр байхад манайд тэр 50 сая төгрөгөнд багтах сууц барихад хүндрэлтэй. Барилаа ч чанарын асуудал хөндөгдөнө байх. Бидний зүгээс чанартай орон сууц барихыг эрхэмлэдэг” гэсэн хариултыг өгсөн юм. Мөн бид эндээс “Дөнгөж өчигдөр эхний ээлжинд эдгээр сууцанд захиалгаөгөх боломжтой хэмээн заралсан орон сууцнууд яагаад бүх захиалгаа аваад дууссан талаар тодруулахад “Бид энэ мэдээллийг өнгөрсөн есдүгээр сард Газрын зураг, геодизи, зураг зүйн газарт явуулсан. Бараг хагас жилийн өмнө явуулсан мэдээллийг одоо нийтэд ил болгож байгаа учраас ийм ойлголтын зөрүү гарч байгаа юм” гэж байлаа. Хөтөлбөрт тансаг зэрэглэлийн 1 метр кв нь 2 сая 310 мянган төгрөгийн үнэтэй барилга ч бий Бид эндээс гараад тус барилгын барьж буй “Хурд” констракшнын дараагийн бүтээн байгуулалт болох Энхтайвны гүүртэй хаяа залган байрлах “Аппартмент кей эйч”-ийг зорьсон юм. Гоёмсог шийдэл бүхий оффис хажуудаа сүндэрлүүлэх энэхүү тансаг зэрэглэлийн хороололын чулуун хавтангаар өрөгдөж, орчин үеийн тансаг засалтай энэ орон сууцнаас худалдан авахыг хүсвэл метр квадратыг нь хоёр сая гурван зуун арван мянган төгрөгөөр худалдан авах боломжтой гэж байлаа. Уг орон сууцны хамгийн бага талбайтай сууц нь 34.58 метр квадрат. Энэ нь мөн л түрүүчийн адил 80 гаруй сая төгрөгийн үнэтэй гэсэн үг юм. Ирэх оны IV улиралд ашиглалтад орох уг сууцны хамгийн том байр нь 125.71 метр квадраттай юм билээ. Энэ байрны үнийн дүнг тооцоолон үзэхэд, бага дунд орлоготой иргэдэд зориулсан эсэхэд нь эргэлзээ төрүүлж байлаа. Эндээс бид нийслэлийн хамгийн их хүн амтай дүүрэг болох Баянзүрх дүүргийг зорьж, “Ногоон төгөл” хотхонд ирсэн юм. “Гангар инвест”-ийн барьж буй уг орон сууцны метр квадрад нь нэг сая 600 мянган төгрөгийн үнэтэй гэсэн. Мөн л жижиг метр квадраттай байрнуудын захиалга дууссан тул 80-аас дээш сая төгрөгийн байрыг эндээс худалдан авах боломжтой гэж байлаа. Мөн Баянгол дүүрэгт байрлах “Дако” орон сууцны хороолол ч бидэнд ийм хариултыг өгсөн юм. Уг орон сууцанд байр авах хүсэлтэй иргэд нэг метр квадратыг нь нэг сая дөрвөн зуун тавин мянган төгрөгөөр хоёроос дээш өрөө сууцыг худалдан авах боломжтой гэж байсан юм.   Байр авах хүсэлтэй 30 иргэний хүсэлтийг өнөөдөр банк руу шилжүүлнэ Эндээс бид ОССК руу очсон юм. Манай сурвалжлах хэсгийг 15.30 цагийн орчимд энд ирэхэд өдөржин бужигнасан иргэд ерөнхийдөө шингэрч, хөл хөдөлгөөн намжсан гэх боловч 40 гаруй иргэн тус төвийн эдийн засагчдын үүдээр эргэлдэж байлаа. Учир нь тус корпораци өдрийн 09.00-16.00 цаг хүртэл “100 мянган айлын орон сууц” хөтөлбөрт оролцохыг хүссэн иргэдийн өргөдлийг хүлээн авч байгаа бөгөөд 16.00 цагаас хойш дотоод ажлаа хийж байгаа юм байна. Дээрх цагийн хуваарийн дагуу өдөрт тус корпорацид 500-600 хүн уг хөтөлбөрийн талаар мэдээлэл авах болон  өргөдлөө өгөхөөр хандаж байгаа ажээ. Харамсалтай нь иргэдийн сонгосон орон сууц нь “100 мянган айлын орон сууц хөтөлбөр”-т хамрагдаагүй, сонгосон сууц нь зээлийн хэмжээнээс давсан ч зөрүү мөнгөө төлөх чадваргүй гэх шалтаанаар 70-80 хувь нь хоосон буцаж байгаа тул багагүй бухимдалтай байгаа гэж байлаа. Иргэдийн худалдан авах орон сууцны үнэ өндөр байгаатай холбоотойгоор ОССК дээр багагүй маргаан дэгдэж, ажиллахад хүнд нөхцөл байдал үүсэж байга талаар тэндэхийн ажилчид хэлж байлаа. Хөтөлбөрт хамрагдах хүсэлтэй иргэдийн эхний өргөдлийг авч байгаа өдөр дунджаар 500 гаруй хүн хандсанаас 30 хүний өргөдлийг хүлээн авах боломжтой хэмээн ОССК өчигдөр хүлээн авчээ. Эдгээр иргэдийн өргөдлийг үдийн 16.00 цагаас хойш судлан, өнөөдөр сонгогдоод буй “Төрийн банк, “Капитал” банк руу шилжүүлнэ гэж байлаа. Б.Баясгалан: Өр тавиад урьдчилгаагаа цуглуулсан Энэ мэт мэдээллийг авах үеэрээ уг зээлд хамрагдахаар материалаа цуглуулан явж байсан Б.Баясгалан гэх залуутай цөөн хором ярилцсан юм. -Чи аль хороололд орон сууц сонгосон бэ? -“UB palace”-ын хойд талд байрлах “Дако”-гийн байрнаас сонгож, гэрээгээ хийсэн. -Хэдэн метр квадратай байр сонгосон бэ. Одоо ямар шатандаа бичиг баримтаа бүрдүүлээд байна вэ? -35 метр квадраттай нэг өрөө байр. Нэг метр квадрат нь нэг сая 450 мянган төгрөг. Нийт 50 сая 750 мянган төгрөг болж байгаа. Үүний урьдчилгаа таван сая долоон зуун тавин мянган төгрөгөө төлөөд компанитайгай гэрээгээ байгуулсан. 45 сая төгрөгийг энэ зээлд хамрагдаж төлөхөөр төлөвлөсөн. -Өнөөдөр өргөдлөө өгч амжаагүй юм шиг байна. Ямар шалтгаанаар өргөдлөө өгөөгүй юм бэ? -Миний сонгосон байр хараахан ОССК-тай гэрээгээ байгуулж амжаагүй байна гэсэн. “Дако”-гийн зүгээс бичиг баримтаа бүрдүүлээд өгсөн. Тэр бичиг баримтыг нь дүүрэг дүүргээр компаниудынхыг нийлүүлж байгаад энд өгдөг юм байна. Одоогоор хараахан ирээгүй байна гэсэн. Ийшээ ирж гэрээгээ хийснийхэн дараа дахиж ирэх л болж байх шиг байна. Хоёр дахь ээлжийнх хэсэгт хамрагдах юм шиг байна. -Чиний тооцоолсноор сард банкинд хэдэн төгрөг төлөхөөр байна. Ам бүл хэдүүлээ вэ. Энэ зээлийн нөхцөл ямар санагдаж байна? -Миний тооцоолсноор сард банкинд 300-350 мянган төгрөг төлөх юм билээ. Би эхнэр, хүүхэдтэйгээ амьдардаг. Өрхийн орлого маань 800 мянга гарантай учраас боломжийн санагдаж байгаа. -Зургаан хувийн зээлийн журам батлагдсаны дараагаас л орон сууцаа хөөцөлдсөн үү. Өмнө нь орон сууц авах талаар бодож байсан уу. Засгийн газрын энэ зээл хэр их хөнгөлөлт болж байна вэ? -Өмнө байр авна гэхэд 30 хувийн урьдчилгаа нэхээд хэцүү байдаг байсан. Энэ бол яах аргагүй боломж. Зээлийн хүү энэ тэр нь бага байгаа нь таалагдаж байгаа. -Урьдчилгаа мөнгөө хэрхэн цуглуулав. Залуу гэр бүлийн хувьд хүндрэлтэй байв уу? -Таван сая төгрөг цуглуулна гэдэг чинь хэцүү шүү дээ. Хүмүүсээс зээлж бариад л цуглуулж өгч байна. Энэ талаар хоёр, гурван жилийн өмнө хэлсэн бол цуглуулах л байсан. Яг битүүний орой энэ талаар гэнэт мэдээлэл авсан болохоор цаг хугацаа их шахуу байлаа. Энэ мэтчилэнгээр Б.Баясгалан шиг гартаа ОССК-иас гаргасан боршурыг атгасан залуус уг байгууллагын нэг давхараар холхиж байлаа. Тэдний амнаас хэт өндөр үнэтэй байгаа орон сууцнуудын талаар болон өмнө нь орон сууц авч байгаагүй гэсэн түүхчилсэн лавлагааг авахаар Иргэний бүртгэл мэдээллийн төв дээр дугаарлаж байгаа хүмүүсийн ачааллын талаар болон тэнд мөн л лавлагаа авах гэсэн хүмүүсийн 70-80 хувь нь буцаж байгаа талаар ам уралдан ярьж байсан юм. Тус төв дээр очсон хүмүүсийн ихэнх нь өмнө эцэг, эхийнхээ байр сууцан дээр хамтран эзэмшигчээр нэрээ бичүүлсэн хүмүүс байсан хэмээн иргэд хэлж байлаа. Энэ мэтчилэнгээр өдөрт 500-600 гэр бүл орон сууцанд орохоор бичиг баримтаа барин ажлаа орхин байж “100 мянган айлын орон сууц” хөтөлбөрт хамрагдахаар явж буй боловч цөөн тооны хүмүүс л холбогдох бичиг баримтаа бүрдүүлж, сонгосон орон сууцны компанитайгаа гэрээгээ байгуулж байна. Иргэдийг тэр чигт нь хөдөлгөөнд оруулж байгаа уг хөтөлбөр үнэхээр өөрийн зорилтоо хангаж бага, дунд орлоготой иргэдийг орон сууцжуулна гэдэгт иргэд эргэлзсээр. С.Энхзаяа Н.Ариунаа