Монголын Мянганы сорилтын сангийн Эрүүл мэндийн төсөл нь ЭМЯ, ХӨСҮТ-тэй болон “Итгэл” Хавдаргүй Монгол Үндэсний Сантай хамтран умайн хүзүүний хорт хавдрын эсрэг дархлаажуулалтын кампанит ажлыг үе шаттайгаар хэрэгжүүлж буй.   Эхний ээлжинд умайн хүзүүний хорт хавдрын өвчлөлийн үзүүлэлт харьцангуй өндөр байгаа Сэлэнгэ, Өмнөговь аймаг, нийслэлийн Баянгол, Баянзүрх дүүргийн 11-15 насны 14491 охидыг сонгон дархлаажуулах ба эцэг эхээс нь зөвшөөрөл авсны үндсэн дээр дархлаажуулалтад хамруулж байна. Уг вакцины гурван удаагийн тунг 11-15 насны охидод 2-6 сарын зайтай булчинд тарих бөгөөд умайн хүзүүний хорт хавдар болон бэлгийн үү үүсгэдэг Хүний хөхөнцөр вирусын 6/11/16/18 хэвшинжийн халдвараас 95-100 хувь хамгаалах дархлаа тогтоодог аж.   Одоогоор сонгогдсон дөрвөн газарт 11-15 охидод тарьж байгаа хүний хөхөнцөр вирусын эсрэг дархлаажуулалт нийт дүнгээрээ 71.8 хувьтай явагдаж байна.   Дашрамд дуулгахад, 1996 оны гуравдугаар сарын 12-оос 2001 оны гуравдугаар сарын 11-ны хооронд төрсөн 11-15 насны охид ХӨСҮТ дээр сайн дураараа хүний хөхөнцөр вирусын эсрэг дархлаажуулалтанд хамрагдаж болох аж. Энэ талаар 451798 дугаарын утаснаас лавлах буюу ХӨСҮТ-ийн Сайн дурын дархлаажуулалтын кабинетийн 101 тоот өрөөнд ирж тариулж болно гэдгийг ХӨСҮТ-өөс мэдэгдлээ.   П.Наран