УИХ-ын гишүүн С.Бямбацогт Ерөнхий сайд С.Батболдод махны үнийн хөөрөгдлийн талаар асуулга тавьжээ. Тэрээр өнгөрсөн жил мөн махны үнийн асуудлаар холбогдох газар нь анхааруулж байсан ч энэ жил үнэ хөөрөгдөх явдал дахин давтагдсан гэдгийг асуулгадаа онцолжээ. "Монгол Улс 2,7 сая хүн амтай, 40 сая гаруй толгой малтай, мал аж ахуйн орон боловч өнөөдөр иргэд махыг маш өндөр үнээр худалдан авч байна. Өнгөрсөн нэгдүгээр сард автобензин, дизелийн түлшний үнэ өссөн нь махны үнэ нэмэгдэх үндсэн шалтгаан болсон. Мөн махны үнийн өсөлт нь махны бэлтгэл, нийлүүлэлтийн тогтолцоо, түүнд тавих хяналт хангалтгүй байгааг харуулж буй хэрэг" гэсэн байна. УИХ-ын гишүүн С.Бямбацогт нөөцийн махны хэмжээ хангалтгүй, амт чанар муутай байгаа талаар болон үнийг ямар аргачлалаар, ямар байгууллагаас тогтоодог. Үнэхээр үнэн бодит үнийг тогтоож байгаа эсэх, цаашид махны үнийг өсгөхгүй байх талаар авах бодлого зэрэг асуудлыг асуулгадаа тусгажээ. Нийслэлийн хүн амын махны хэрэгцээг дундаж нормоор тооцоход өдөрт 301, сард 9029 тонныг хүнсэнд хэрэглэдэг байна. Хоёрдугаар сард нийслэлд 3000 тонн нөөцийн мах борлуулахаар тооцсоноос харахад нөөцийн махны хэмжээ хангалтгүй байгааг харууллаа гэж эрхэм гишүүн асуулгадаа онцолжээ. Нийслэлийн иргэдийн хэрэгцээнд зориулан бэлтгэж буй нөөцийн мах зах зээлийн дунджаас харьцангуй бага үнэтэй худалдаалагдаж байгаа боловч амт, чанар хангалтгүй, туранхай мах бэлтгэгдсээр байна. Энэ тал дээр тавьж буй хяналт, Нийслэлийн Засаг даргын авч хэрэгжүүлж буй арга хэмжээ болон мах бэлтгэлийн үйл явцын талаар мэдээлэх, цаашид махны үнийг тодорхой хэмжээнд барих, үнийн хөөрөгдөл үүсгэхгүй байхын тулд арга хэмжээ авахаар төлөвлөж байгаагаа дэлгэрэнгүй танилцуулахыг асуулгадаа шаарджээ. Асуулгын хариуг ажлын 14 хоногийн дотор бичгээр ирүүлж, улмаар УИХ-ын чуулганы нэгдсэн хуралдаанд сонсгох аж. С.Заяа