Монгол Улсаас Япон Улсад суух Онц бөгөөд Бүрэн эрхт Элчин сайд С.Хүрэлбаатар өнөөдөр Япон Улсын Эрхэм дээд Хунтайж Нарухито-д Итгэмжлэх жуух бичгээ барилаа. Элчин сайд С.Хүрэлбаатар Монгол Улсын Ерөнхийлөгч Ц.Элбэгдоржийн мэндийг Цог жавхлант Эзэн хаан Акихито, Эрхэм дээд Хунтайж нарт уламжлаад Монгол Улс, Япон Улсын стратегийн түншлэлийг хэрэгжүүлэн хөгжүүлэхийн төлөө чармайж ажиллахаа илэрхийлсэн байна. Хунтайж Япон Улсын хэл, соёлыг мэддэг, Япон Улс, Монгол Улсын харилцаанд хувь нэмрээ оруулж ирсэн Элчин сайд дахин томилогдож ирсэнд баяр хүргээд Ерөнхийлөгч Ц.Элбэгдоржийн амар амгаланг асууж хариу мэндчилгээ дэвшүүлжээ.   Хунтайж өнгөрсөн онд Япон орныг нэрвэсэн Байгалын гамшгийн үеэр Монголын ард түмэн, төр, засаг сэтгэл харамгүй тусламж дэмжлэг үзүүлсэнд талархал илэрхийлээд Япон, Монголын хоёр орны харилцаа, хамтын ажиллагаа өдрөөс өдөрт өргөжин гүнзгийрч байгаад сэтгэл хангалуун байгаагаа илэрхийлэв. Хунтайж 5 жилийн өмнө Монгол Улсад айлчилснаа халуун дотноор дурсан яриад Монголын ард түмэнд сайн сайхныг ерөөсөн байна. Энэ тухай Гадаад харилцааны яамнаас мэдээллээ.   Д.Цэцэг