2008 оны долдугаар сарын 1-ний хэрэгт буруутгагдаж байгаа цагдаагийн экс удирдлагуудыг өчигдөр буюу энэ сарын 19-ний 18.00 цагийн орчимд Сүхбаатар дүүргийн II эмнэлгээс ШШГЕГ-ын харъяа хорих 461 дүгээр ангийн эмнэлэг рүү хүргэхээр болсон талаар мэдээлэл манай сайтад ирсэн юм.
Уг мэдээллийн дагуу манай сурвалжлах хэсэг Сүхбаатар дүүргийн II эмнэлэг дээр 18.30 цагт очсон билээ. Энэ үед эмнэлгийн гадаа цагдаагийн нэмэгдүүлсэн бүрэлдэхүүн ирж, 30 орчим цагдаа хамгаалалтад гарсан. Мөн эмнэлгийн гадаа үүдэнд цагдаагийн экс удирдлагуудын ар гэрийнхэн “Цагдаа улс төрийн, Ц.Элбэгдоржийн золиос биш” хэмээн дуу дуугаа авалцан орилж байсан юм.
Энэ үйл явдал тус эмнэлэгт хэвтэн эмчлүүлж байгаа хүмүүсийн амар тайван байдалд нөлөөлөхөөс гадна тэдэнтэй уулзахаар ирсэн ар гэрийнхнийхэн хөл хөдөлгөөнийг хязгаарлаж байлаа. Үүнээс гадна тус эмнэлэгт Яаралтай түргэн тусламжаар хүргэгдэн ирж буй өвчтөнг дотогш нэвтрүүлэхэд багагүй хүндрэл учруулж байсан юм.
Энэ мэтчилэнгээр хэвлэл мэдээллийн байгууллагууд болон цагдаагийн төлөөлөл нэмэгдсээр эмнэлгийн гадна талд 21.20 цагийн орчимд 120-130 орчим хүн цугларсан байлаа. Тэдгээрийн дунд ахмад настны тэтгэвэртээ гарсан цагдаа нарын төлөөлөл ирсэн байв.
Тэрбээр “Би энд хүний мууг үзэх гэсэн дээ, эсвэл бусдыг турхирах гэсэн дээ ирээгүй. Монголд шударга ёс байдаг юм уу. Түүнийг хэрхэн хэрэгжүүлж байгааг өөрийн нүдээр харах гэж ирсэн юм. Цагдаа ч гэсэн хүн. Энэ арми Монголын нэг хэсэг, хүн учраас тэдэнд жаахан ч гэсэн эрх байх ёстойг төр засаг харж байна уу гэдгийг харах гэсэн юм. Цагдаа гэдэг нохойд барьдаг мод биш биз дээ” хэмээж байлаа.
Түүнтэй ийн цөөн хором ярилцсаны дараа
ЦЕГ-ындаргынүүрэггүйцэтгэгчасан, хошуучгенерал Ч.АмарболдынөмгөөлөгчО.Алтангэрэл үйлчлүүлэгчтэйгээ уулзахаар эмнэлэг дээр ирсэн юм.
Энэ үеэр түүнээс цөөн асуултад хариулт авлаа.
О.Алтангэрэл:Эмч нар өвчтнүүдийг зөөх нь амь насанд нь аюултай гэсэн
-Та үйлчлүүлэгчидтэйгээ уулзсан уу?
-Үйлчүүлэгчтэйгээ уулзаж чадсангүй. Өрөөнийхөн үүдэнд зогсож байгаад гарч ирлээ.
-Генерал Ч.Амарболдын биеийн байдал ямар байна вэ?
-Сэхээн амьдруулах тасгийн эмчийн хэлж байгаагаар “Яагаад ч өнөөдөр энэ хүнийг эмнэлгээс авч явж болохгүй. Эндээс авч явбал амь насанд нь хохирол учирна. Тиймээс бид явуулах эрхгүй. Бид тангарга өргөсөн эмч нар” гэж байна. Тиймээс цагдаа нар эмнэлгийн хаалга үүдийг эвдэлтэй нь биш, хүч түрэмгийлсэн ажиллагааг тэр тусмаа Сэхээн амьдруулах тасагт хийх боломжгүй гэж үзэж байх шиг байна.
-Ар гэрийнхэн нь цагдаа нартай зөрчилдөөд сэтгэл санаа нь тавгүй байх шиг байна?
-Ар гэрийнхэн нь гэхолон хүн алга байна.
-Шүүхээс захирамж гаргасан гэсэн. Та үүнтэй танилцсан уу?
-Шүүгчийн захирамж өдөр гарсан. Цагдан хорих шийдвэр хэвээр байгаа. Энэ шийдвэрийг ШШГЕГ-ын 461 дүгээр ангид үргэлжлүүл гэсэн агуулгатай байсан. Одоогоор хүчин төгөлдөр болоогүй байгаа өөр нэг захирамж бий. Энэ сарын 16-ны өдөр гарсан захирамж өмнөх захирамжийг хүчингүй болгоогүй тул одоогоор хүчин төгөлдөр биш байгаа. Уг захирамжид Сүхбаатар дүүргийн цагдаагийн хэлтсийн харъяанд өгч, Сүхбаатар дүүргийн эмнэлэгт шилжүүлье гэсэн.
-Өмнөх шийдвэрээ хүчин төгөлдөр болголгүй дахин захирамж гаргалаа. Алийг нь мөрдөх ёстой юм бэ?
-Хүчингүй болсон болоогүй шүүхийн захирамж өнөөдөр гарсан. Хүчин төгөлдөр хэрэгжих ёстой. Цагдаагийн байгууллага энэ үүргийнхээ дагуу ирсэн байна. Миний хувьд үйлчлүүлэгчтэйгээ уулзахаар ирсэн боловч дотогш оруулсангүй. Эмч нар өөрсдөө дотроосоо түгжихээд оруулахгүй байна. Энэ байдал цагдаа нарыг ч хүнд байдалд оруулж байгаа. Эмнэлгийн хаалгыг эвдээд дотогш нэвтрээд дусал, аппарат зүүсэн байгаа өвчитнүүдийн эмчилгээг таслаад аваад гарна гэдэг байж болохгүй зүйл.
-Шүүгдэгчид шүүх бүрэлдэхүүнээс татгалзсан. Энэ асуудал юу болсон бэ?
-Татгалзсаныг хүлээж авахгүй гэсэн хариуг өнөөдөр өгсөн.
-Таны үйлчлүүлэгч эмнэлэгт хэвтээд тав хонож байна. Даралт нь сахарын хэмжээ нь ямар байна вэ?
-Би хэвлэл мэдээллийнхэн та бүхний адил мэдээлэлтэй байгаа. Цусан дахь сахарын хэмжээ нь 20-иос буурахгүй байна гэсэн. Энэ нь их хэмжээ юм шиг байна. Би анагаахын хүн биш болохоор энэ талын ойлголт муу байна.
-Та өмнөх өдрүүдэд үйлчлүүлэгчтэйгээ уулзсан уу?
-Ар гэрийнхэнтэй нь уулзаад биеийн байдлыг нь асууж байгаа. Өнөөдөр захирамж гарсан гээд уулзах гэж ирсэн чинь оруулсангүй. Өмгөөлөгч нь байна гээд учирлаад цагдаа нарын хамгаалалтыг нэвтрээд очихоор эмч нар нь цаана нь Сэхээн амьдруулах тасгаа түгжихээд оруулахгүй байна. “Чиний өмгөөлөгч байх бидэнд хамаагүй. Бид хэнийг ч оруулахгүй” гэж байна.
-Эмч нарын энэ эсэргүүцлийг хүлээн аваад шүүхийн шийдвэрийг хойшлуулах боломж бий юу?
-Цагдаа нарын хувьд шүүхийн шийдвэр биелүүлэх ёстой. Гэхдээ энэ олон хүний амь насыг хариуцаж байгаа хүмүүсийг зодоод, хөөгөөд явуулалтай нь биш. Байдал нь өөрөө их ээдрээтэй боллоо.
Ийм байдлаар тэрбээр бидэнд мэдээлэл өгсөн юм. Үүний дараа 22.23 цагийн орчимд эмнэлгийн үүдэнд цагдаа нар 06-77 УНБ улсын дугаартай “Delica” маркийн автомашин 22.23 цагийн орчимд эмнэлгийн үүдэнд авч ирсэн юм. Энэ үеэр эмнэлгийн үүдэнд байсан цагдаагийнхны ар гэрийн төлөөлөл цагдаагийн экс удирдлагуудыг “Энэ машинд суулгавал машины өмнүүр орж дайруулна.
Бидний зүгээс өнөөдөр 2-3 хүний амь насыг золиослоход бэлэн. Одооноос эхлээд цагдаа нарыг гудамжны нохой ч тоохгүй. Та нар өнөөдөр нэг их сүрхий шударга төрийн төлөө ажиллаж байна гэж бодож байна уу. 2008 оны долдугаар сарын 1-нд та нар энэ дарга нартайгаа хамт цусаа гойжуулаад явж байсан биз дээ. Та нарыг хэн ч хамгаалахгүй шүү дээ. Хувцасаа тайлаад ажлаа хаяач.Хүний эрх эрх чөлөө гэж яриад л байна. Тэр чинь хаана байна.
Өнөөдөр парламентийн засаглалтай орон уу, Ерөнхийлөгчийн засаглалтай юм уу. Ц.Элбэгдорж болъё” хэмээж байсан юм. Ийн цагдаагийн экс удирдлагуудын ар гэрийнхэн болон цагдаа нарын тэмцэл нэг хэсэг ширүүссэн юм.
Үүний дараа удалгүй Сүхбаатар дүүргийн шүүхийн Тамгын газрын дарга Д.Бат-Эрдэнэ, Нийслэлийн цагдаагийн газрын дарга, хурандаа Ө.Энхтөр нар ар араасаа ирж, эмнэлэг рүү орсон юм. Шүүх, цагдаагийн удирдлагууд ийн ирсэн боловч асуудлыг намжааж чадсангүй.
Үүний дараа Эргүүлхамгаалалтынгазрындаргаасан, цагдаагийнхурандаа Ш.Батсүхийн дүү хэмээн бидэнд өөрийгөө танилцуулсан эмэгтэй “Намайг цагдаагийн албан хаагчид хүч хэрэглэж эмнэлгээс гаргасан. Цагдаа нар өнөөдөр у
лс төрийн золиос болж байна.
Ерөнхийлөгч шударга гэсэн баг зүүгээд, ард түмнээ хуурч байна. Ц.Элбэгдорж жил гарны дараа суудлаасаа бууна. Тэр үед монголын ард түмэнд шүүгдэнэ. Ийм цаг ирнэ гэж би бодож байна. Ард түмэн, цагдаа хоёрыг хагаралдуулж байна. ЦЕГ-ын Ц.Сандаг-Очир өнөөдөр цагдаа нарыгаа хамгаалах ёстой. Албан үүргээ гүйцэтгэж байсан хүмүүсээ өмөөрч яагаад өөрийн байр сууриа илэрхийлэхгүй байгаа юм бэ. Төр иргэнээрээ тоглож байна. Цагдаагийн дарга нар нь тэнд эмчлүүлж байхад хонгилын өрөөгөөр нь дүүрэн цагдаа нар зогсож байна. Дарга нараа өмөөрөхгүй байна.
Өнөөдөр 2008 оны долдугаар сарын 1-ний үймээнийг намжаасан хүмүүс энэ хэрэгт буруугүй” хэмээж байсан юм. Энэ мэтчилэнгээр үйл явдал өрнөж, үдшийн 00.35 цаг гэхэд цагдаагийнхан хамгаалалтаа буулгаж, долоон цаг үргэлжилсэн албадан саатуулах ажиллагааг зогсоосон юм. Учир нь Сүхбаатар дүүргийн II эмнэлгийн Сэхээн амьдруулах тасгийн эмч нар “Өнөөдрийн хувьд цагдаагийн экс удирдлагуудыг эмнэлгээс авч явах боломжгүй.
Энэ нь эдгээр хүмүүсийн эрүүл мэндээс гадна тухайн тасагт хэвтэн эмчлүүлж байгаа бусад хүмүүсийн эрүүл мэнд, амь насанд халтай” хэмээн цагдаагийнханд тайлбарласан тул цагдаагийнхан ийн албадан саатуулах ажиллагааг зогсоож, хамгаалалтаа буулгахаар боллоо” хэмээн генерал Ч.Амарболдын өмгөөлөгч О.Алтангэрэл сэтгүүлчдэд мэдээлсэн юм.
Харин энэ үеэр цагдаа нар болон эмнэлгийн зүгээс албан ёсны байр суурь илэрхийлэхийг хүссэнгүй. Ингээд үдшийн 00.35 цагийн орчимд эмнэлгийн гадаа цугласан олон тарж, намжсан юм.
Н.Ариунаа С.Энхзаяа
СЭТГЭГДЭЛ БИЧИХ