УИХ-ын 2008 оны сонгуулийн үеэр эмх замбараагүй байдал үүсч таван хүн амь үрэгдэж олон арван цагдаагийн албан хаагч гэмтэж бэртсэн хэрэгт тухайн үеийн цагдаагийн удирдлагуудыг холбогдуулан шалгасан юм.

Хэдэн жилийн турш мөрдөн байцаалт нь сунжирч хэрэгсэхгүй  болж байсан уг хэрэгт холбогдсон Цагдаагийн ерөнхий газрын даргын үүрэг гүйцэтгэгч асан, хошууч генерал Ч.Амарболд, Эргүүл хамгаалалтын газрын дарга асан, цагдаагийн хурандаа Ш.Батсүх, Нийслэлийн цагдаагийн газрын дарга асан, цагдаагийн хурандаа О.Зоригт, тус газрын Хэв журмын хэлтсийн дарга асан, цагдаагийн дэд хурандаа Г.Ганбаатар нарыг шүүх хурал өнөөдөр 10.00 цагт Цагдан хорих төвд болно.

Өмнө нь албан тушаалын байдлаа хэтрүүлсэн гэсэн зүйл ангиар шалгагдаж өршөөлд хамрагдсан хошууч генерал Ч.Амарболд нарт холбогдох хэргийг Ерөнхий прокурорын даалгавраар Прокурорын дэргэдэх мөрдөн байцаах албанд сэргээн шалгаж зүйл ангийг нь өөрчилсөн юм. Хэргийн мөрдөн байцаалт ч дуусч хяналтын шатнаас тэдэнд гурван зүйл ангиар ял төлөвлөж хавтаст хэргийг нь Сүхбаатар дүүргийн шүүхэд шилжүүлсэнээр энэ сарын 14-ний өдөр хурал нь товлогдсон.

 Гэвч  хурал товлогдсон цагаасаа хойшилж цагдаагийн экс дарга нарыг Цагдан хорих төвд хорих шийдвэр гаргасан байна. Тэднийг 35 дугаар зүйлийн 35.5 буюу гэмт хэрэгт хамтран оролцсон, Эрүүгийн хуулийн 274 дүгээр зүйлийн 274.2 буюу Монгол Улсын иргэн зэвсэгт хүчин, бусад цэрэгт, цэргийн үүрэгтэн дайчилгаа, сургууль, цугларалтын үед цэргийн алба хаах талаар хуулиар тогтоосон журмыг зөрчиж энэ бүлэгт заасан гэмт хэргийг үйлдсэн гэсэн үндэслэлээр шүүнэ.

Мөн 294 дүгээр зүйлийн 294.2 дахь хэсэгт зааснаар захирагч эрх мэдэл албан тушаалын байдлаа урвуулан ашигласан гэсэн үндэслэлээр буруутгаж байгаа юм. Өнөөдрийн шүүх хуралдаанд  улсын яллагчаар С.Хишигжаргал оролцох бөгөөд өмнөх бүрэлдэхүүн болох Ч.Хосбаяр, М.Алдар, С.Оюунчимэг нар шүүгчээр орно. Энэхүү хэргийг шүүх хурал өнгөрөгч хоёрдугаар сарын 27-нд болохоор анх товлогдсон ч хоёр өмгөөлөгч хүрэлцэн ирээгүй, 2008 оны долдугаар сарын нэгний үед төрийн тэргүүнээр ажиллаж байсан Н.Энхбаяр, Ерөнхий сайд асан С.Баяр, Хуульзүй дотоод хэргийн сайд асан Ц.Мөнх-Оргил, ҮАБЗ-ийн гишүүн асан Д.Лүндээжанцан нарыг гэрчээр оролцуулах хүсэлт гаргасан зэрэг шалтгаанаар гуравдугаар сарын 14 хүртэл хойшлуулж байв. Сүхбаатар дүүргийн шүүхээс дээрх нэр бүхий хүмүүст шүүх хуралдаанд биеэр оролцох талаар дахин мэдэгджээ. Үүний хариуд Н.Энхбаяр, С.Баяр, Д.Лүндээжанцан, Ц.Мөнх-Оргил нар шүүх хуралд оролцохоо урьдчилан мэдэгдсэн байна. Үймээний үеэр буудуулж амь үрэгдсэн дөрвөн залуугийн ар гэрийнхэн, буудуулж шархадсан зургаан залуу энэ хэргийн хохирогчоор тогтоогдсон. Өнөөдрийн шүүх хуралд үймээний үеэр буудуулж амиа алдсан Э.Доржсүрэнгийн аав Ц.Энхбаяр, Р.Мөнх-Эрдэнийн ээж Г.Тунгалаг, Ч.Энхбаатарын дүү Н.Хэрлэн нараас гадна тухайн өдөр хөлөндөө буудуулж шархадсан Э.Энхтөр, Б.Ариунбаатар, Ж.Батзаяа нар шүүх хуралд оролцох болжээ. Түүнчлэн хохирогч Ц.Энхбаярын өмгөөлөгчөөр О.Баасанхүү, болон цагдаагийн экс удирдлагуудын ар гэрийнхэн оролцоно. Түүнчлэн шүүгдэгч нараас Г.Ганбаатарын өмгөөлөгч Д.Оросоо, Ц.Мөнхдэлгэр нар Ч.Амарболдын өмгөөлөгчөөр О.Алтангэрэл, Ш.Батсүхийн өмгөөлөгчөөр Д.Энхтунгалаг, Ц.Итгэл, О.Зоригтын өмгөөлөгчөөр Л.Өлзийхүү нар оролцоно.

Н.Бүжин