Нийгмийн хамгаалал, хөдөлмөрийн сайд Т.Гандигаас дараахи асуултад хариулт авлаа. -Өндөр настан, хөгжлийн бэрхшээлтэй иргэдэд нэг сая төгрөгийг ямар бичиг баримтыг үндэслэн олгох вэ? -Хүний хөгжил сангийн хувь, хишиг тарааж байсан үндсэн тогтолцоогоороо нэг сая төгрөгийг олгоно гэж үзэж байгаа. Хүний хөгжлийн дэвтэр дээр бичилтүүд хийгдэнэ. Хамгийн гол нь хөгжлийн бэрхшээлтэй иргэн, ахмад настанд нэг сая төгрөг олгох ажлын хүрээнд тодорхой хэмжээний асуумжууд авсан. Хувьцаа авна гэсэн өндөр настан, хөгжлийн бэрхшээлтэй иргэдийг ангилж хувьцаа авах иргэдийн хэсэг рүү ангилах ажил хийнэ. Энэ журмуудыг гаргахаар ажиллаж байгаа. -Нэг сая төгрөгийг олгохдоо иргэдээс шимтгэл авах уу? -Банк аливаа үйлчилгээг үнэгүй хийдэггүй. Бүтээгдэхүүн хийж байгаа, хүн цалинжуулж байгаа, алслагдсан бүсэд бэлэн мөнгөн хүргэж байгаа учраас тодорхой шимтгэл авна. -Өндөр настан, хөгжлийн бэрхшээлтэй иргэдээс бусад иргэд нэг сая төгрөгөө орон сууцны зээлийн урьдчилгаа хэлбэрээр авч болох уу. Өмнө нь Засгийн газраас болно гэж мэдээлж байсан шүү дээ? -Журам нь бол гарсан. Орон сууцны зээлд хамрагдах асуудлын хүрээнд тодорхой хэмжээний бүртгэлжүүлэлт хийгдээд анх удаа орон сууц авч байгаа, өмнө нь үндсэн хөрөнгө авч байгаагүй, зургаан хувийн хүүтэй зээлийн урьдчилгаа төлөх чадвартай хүмүүсийг зээлд хамруулж байгаа. Эрэлт маш их байна. “Хүний хөгжил сан”-гаас олгож байгаа эрэлтэд нийцсэн хөрөнгө оруулалт мөн болсон байна гэдэг нь харагдаж байна. 55 метр квадрат хүртэл талбайтай орон сууц гэдэг маань гал тогоотой нэг өрөө, эсвэл хоёр жижиг өрөөтай байр гэсэн үг. Эхний хуримтлал бий болгоогүй залуучуудад “Хүний хөгжил сан”-гийн хишиг,  хувийг шилжүүлснээр цаашдаа үндсэн хөрөнгөтэй болтлоо 10 гаруй жилийн хугацаанд төлбөрөө төлөөд явах бололцоо, боломжийг нээж өгч байна. Хүмүүс “Нэг сая төгрөг гэдэг орон сууцны урьдчилгаа төлөхөд дэндүү бага мөнгө. Тиймээс илүү өргөн боломжуудыг судалж үзсэн үү” гэдэг. Нэг өрх 4-5 гишүүнтэй байгаа. Тиймээс нэг хүүхдэд хөрөнгө оруулалт хийж, үндсэн хөрөнгөтэй болоход тусалж нэг сая төгрөгөө нийлүүлээд байрны урьдчилгаа төлж байна. Ингэвэл 50 сая төгрөгийн зээлийн урьдчилгаа таван сая төгрөгийн гаргаж байна гэсэн үг. С.Жигүүр