УИХ-ын гишүүн Я.Батсуурь Нийгмийн даатгалын болон Хөдөлмөрийн тухай хуульд нэмэлт оруулах тухай хуулийн төсөл санаачилсан. Төсөлд “Аж ахуйн нэгж байгууллагын 2-3 хувийн орон тоонд 35-аас дээш насны эмэгтэй, 40-өөс дээш насны эрэгтэй хүнийг ажиллуулахаар тусгасан нь Хөдөлмөрийн тухай хуульд заасан ”Хөдөлмөрийн харилцаанд үндэс, угсаа, арьсны өнгө, нас, эрэгтэй, эмэгтэй, нийгмийн гарал, байдал, хөрөнгө чинээ, эрхэлсэн ажил, албан тушаал, боловсрол, шашин шүтлэг, үзэл бодлоор нь ялгаварлах, хязгаарлах, давуу байдал тогтоохыг хориглоно” гэж заасантай зөрчилдөж байгаа учир дэмжих боломжгүй гэж үзлээ. Түүнчлэн Нийгмийн даатгалын тухай хуульд “35-аас дээш насны эмэгтэй, 40-өөс дээш насны эрэгтэй хүнийг үндсэн ажилтнаар авч ажиллуулбал ажил олгогчоос сар бүр төлөх нийгмийн даатгалын шимтгэлийг төр хариуцахаар заасан нь ажил олгогч шимтгэл төлөхгүйн тулд зөвхөн дээрх насны хүмүүсийг ажилд авах, ажилд авсан хүнээ 35-аас дээш насных хэмээн хуурамчаар мэдүүлэх зэрэг сөрөг үр дагавар үүсгэхээр байна” гэж Засгийн газар үзлээ. Мөн УИХ-ын гишүүн А.Тлейхан, Ц.Цэнгэл нарын санаачлан боловсруулсан Эрчим хүчний тухай хуульд нэмэлт, өөрчлөлт оруулах тухай хуулийн төслийг хэлэлцээд хэд хэдэн саналыг уламжлахаар боллоо.