“Азид гарах гарц 2012 ” нэртэй  ОХУ -ын Эрхүү мужийн компаниудын бизнес уулзалт өчигдөр МҮХАҮТ -нд боллоо. Эрхүү мужийн Засгийн газар болон Оросын “Бизнес контакт” ХХК -тай хамтран явуулж буй тус  уулзалтад Эрхүү мужийн бизнесийн төлөөллөөс гадна Засгийн газрын удирдлагууд оролцов. Уулзалтад оролцогчид энэ үеэр манай уул уурхайн салбарт хамтран ажиллах сонирхлоо илэрхийллээ. Мөн Монгол Улсын Засгийн газраас хэрэгжүүлж байгаа 100 мянган айлын орон сууц хөтөлбөрт хамтрах боломжийг илүүтэйгээр  эрэлхийлж байгаагаа мэдэгдэв.   Оросын муж Эрхүүгийн хувьд барилгын салбарт туршлагатай гэдгийг Сонгинохайрхан дүүрэг дэх Москва хорооллын барилгаас харж болно.  Бидэнд бүтээн байгуулалт хийх техник хэрэгсэл, мэргэжлийн боловсон хүчин үндэс суурь байна. Тиймээс хамтран ажиллах боломжийн талаар ярилцаж, цаашид барилгын салбарын мэргэжилтэн бэлтгэхэд туслалцаа үзүүлнэ гэв.   Энэ удаагийн бизнес уулзалтын үеэр “Ворота в Азию-2012” буюу “Азид гарах гарц-2012” үзэсгэлэн  зохиогдож байна. Тус үзэсгэлэнд  ОХУ-ын хөдөө аж ахуйн компани, аж ахуйн нэгжүүд бараа бүтээгдэхүүн, техник, тоног төхөөрөмжөөр оролцож байгаа  аж. Оросын соёл, шинжлэх ухааны төвд болох тус үзэсгэлэн маргааш өндөрлөнө.   П.Наран