Иргэдийн шудрага шүүх ТТБ-аас өнөөдөр 11.00 цагаас “MN” мэдээллийн төвт сэтгүүлчдэд мэдээлэл хийлээ. Уг байгууллагаас “Шүүхийг шүүх үү?” олон нийтийн санал асуулгыг өнөөдрөөс эхлэн Сүхбаатарын талбайд зохион байгуулах болсон талаараа мэдэгдсэн юм. Уг санал асуулгын хүрээнд иргэдээс шүүхийг шүүх нь зөв эсэх талаар санал хүлээн авахаас гадна, шүүхийн шийдвэрт гомдолтой иргэдийн гомдлыг бүртгэн авч энэ дагуу холбогдох албан тушаалтанд хүргүүлэх аж. Иргэдийн шудрага шүүх ТТБ-ын тэргүүн Х. Бат-Ялалтаас дараах зүйлийг тодрууллаа. -Шүүх шийдвэрийг дүгнэлт өгөх эрх та нарт байгаа юу? Ингэх нь шүүхийн хараат бус байдлыг алдагуулж байгаа юм биш үү? -Шүүх нийгмийн олон асуудлыг шүүж шийдвэрлэдэг. Харин шүүгч нар болоод төрийн албан хаагчдыг шүүх механизм манайд байхгүй. Тиймээс шүүгчийн буруу зөв үйлдэлд иргэд хяналт тавих ёстой юм. Засгийн бүх эрх мэдэл Монгол улсын ард түмэнд байдаг учраас тэднийг шүүх эрх байна гэсэн үг. Шүүхийн хараат бус байдалд халдах эрх хэнд ч байхгүй. Харин шүүхийн гаргасан шийдвэрийг баримтаар дэлгэн гаргах нь хараат бус байдалд халдаж буй хэрэг биш юм. -Шүүхээс ял сонссон хүмүүсээс шүүгчийн буруугаас болж гомдолтой иргэд байдаг уу? -Гомдолтой иргэд олон бий. Бидэнд байгаа мэдээллээр нийт арван мянга гаруй баримт байна. -Та бүхнийг санал асуулга явуулж байгааг улс төржиж байна гэж хардах хүмүүс олон байна? - Энэ бол улс төр намтай огт холбоогүй зүйл. Улс төрд шүүх, хууль хяналтын байгууллагад хариуцлага алдсан албан тушаалтанд хариуцлага тооцдог болгохын тулд бид хууль санаачлах шаардлагатай гэж үзэн улс төрд орсон гэж ойлгож болно. Төв талбайд болж буй санал асуулгад иргэд өөрийнхөө саналыг өгч болно. Үүнд ямар нэгэн улстөрийн зорилго байхгүй. Санал асуулга өнөөдөр 14.00 цагаас эхэлж байгаа. З. Цолмон