Бага насны хүүхэд зам тээврийн осолд өртөж, гэмтэж бэртэх үзэгдэл буурахгүй байгааг мэргэжлийн байгууллагууд мэдээлж байна. Энэ талаар Замын цагдаагийн газрын дарга, цагдаагийн хурандаа Х.Энхжаргалаас тодрууллаа.   -Бага насны хүүхэд автомашинд мөргүүлж гэмтэж бэртсэн, амь насаа алдсан тохиолдол цөөнгүй гарч байна. Хүүхдүүд зам тээврийн осолд орж байгаа тоо баримтаас дурьдвал?  -Бага насны хүүхэд  зам тээврийн осолд өртөх үзэгдэл буурахгүй байна. 2011 оны байдлаар улсын хэмжээнд 41 хүүхэд зам тээврийн ослоор амь насаа алдаж, 930 гаруй хүүхэд гэмтсэн гэх мэдээлэл байна. Энэ нь онгөрсөн оны мөн үетэйгээ харьцуулахад гэмтсэн хүүхдийн тоо 140 хүүхдээр нэмэгдсэн үзүүлэлт юм. Хүүхэд зам тээврийн осолд өртөх явдал үнэхээр том асуудал. Учир нь жилдээ 1000 гаруй хүүхэд гэмтэж, 40 гаруй хүүхэд амь насаа алдана гэдэг үнэхээр харамсалтай.  Тиймээс зам тээврийн ослоос хүүхэд багчуудыг хэрхэн хамгаалж, тэдэнд ямар мэдлэг олгох вэ гэдэг нь маш чухал.   Одоогийн байдлаар сургууль, цэцэрлэгтээ “Ногоон гэрэл-цагаан шугам”-ын талаар мэдлэг олгож, тэмцээн уралдаанд оролцож байгаа хүүхдэд л замын хөдөлгөөний дүрэм журмын талаарх ойлголт бага ч гэсэн бий болж байна. Жолооны курсэд замын хөдөлгөөний дүрмийг зааж байгаа ч энэ чамлалттай. Гэтэл замын хөдөлгөөний огт мэдлэггүй хүн зөндөө бий. Замын хөдөлгөөний дүрмийг мэддэггүй, мэдсэн ч хэрэгжүүлдэггүй байдал нь маш олон хүний амь нас, эрүүл мэндэд хор хохирол учруулж байгаа. Энэ бол монголоос өөр оронд байдаггүй гамшиг.   -Энэ асуудлыг шийдэх ямар боломж байна? -Зам тээврийн осол гэмтлээс урьдчилан сэргийлэх Дэд зөвлөлөөс хоёр асуудлыг тавьж байгаа. Нэгдүгээрт, ЕБС-ийн сургалтын системд нас насанд нь тохирсон мэдлэг олгох. Энэ асуудлыг БСШУ-ны зүгээс их таатай хүлээн авсан тул ирэх хичээлийн жилээс хэрэгжүүлэх төлөвлөгөөтэй байна. Хоёрдугаарт, эцэг эхчүүд хүүхдээ хичээл сургуульд нь хүргэж өгөх.   Аав ээжтэйгээ Замын хөдөлгөөний дүрмээр баримтлан алхах нь хүүхдийн хувьд хамгийн том дадлага сургуулилт байдаг. Гэвч эцэг эхчүүд өөрсдөө дүрэм зөрчин хүүхэддээ үлгэр дууриал үзүүлж байгаа нь үнэхээр харамсалтай. Тиймээс хүүхдүүд ЕБС-д замын хөдөлгөөний дүрэм заалгаж, дадлага турлага хийж, төгсөхдөө жолооч болох нь шалгалтаа өгөөд  үнэмлэхээ авдаг болно. Энэ бол дэлхийн улс орнуудын туршлага. Асуудлыг ингэж гүнээс нь шийдэж эхлэхгүй л бол автозамын осолд хүүхэд гэлтгүй насанд хүрэгчид гэмтэж бэртэж, амь насаа алдах явдал буурахгүй.   П.Наран