Засгийн газрын өнөөдрийн хуралдаанаар хэлэлцсэн асуудлуудын талаар Засгийн газрын хэрэг эрхлэх газрын сайд Ч.Хүрэлбаатараас тодрууллаа. -Засгийн газрын өнөөдрийн хуралдаанаар Иргэний нийгмийн талаар төрөөс баримтлах бодлогын бичиг баримтыг хэлэлцсэн. Ямар шийдвэр гарсан бэ? -Засгийн газрын өнөөдрийн хуралдаанаар хэд хэдэн чухал асуудал хэлэлцлээ. Хуралдааны эхэнд иргэний нийгмийн талаар төрөөс баримтлах бодлогын бичиг баримтыг хэлэлцэн дэмжсэн. Энэ бичиг баримтыг УИХ-д Засгийн газраас өргөн барихаар болсон. Монгол Улсад ардчиллыг цогцлоон хөгжүүлэх гэсэн Үндсэн хуулийн заалтыг зөвхөн улс төрийн намууд хоорондоо өрсөлдөж байвал ардчилал бий болж байна гэж ойлгодог. Гэтэл үүнээс дутахгүй чухал зүйл нь Монгол Улсад иргэний нийгмийн төрийн бус байгууллагын үйл ажиллагаа  оновчтой, зөв явагдвал улс орны хөгжлийн хурдыг нэмэх чухал зүйл мөн. Ингэснээр ардчиллыг цогцлоон бадраахад чухал хувь нэмэр оруулах юм. Тиймээс иргэний нийгмийг Монгол Улсад хөгжүүлэх чиглэлээр төрөөс төрийн бус байгууллагуудтай сүүлийн нэг жилд нягт хамтран ажилласан. Өнгөрсөн сарын эхээр бүх аймаг, дүүргийн төлөөлөл болсон 500 гаруй иргэн оролцсон иргэний нийгмийн талаар төрөөс авч явах бодлогын бичиг баримтын үзэл баримтлалыг боловсруулсан. Үүнийг өнөөдрийн Засгийн газрын хуралдаанаар хэлэлцэн шийдвэрлэлээ. Монгол Улсад ямар нэгэн татварын шинэчлэлт, мал, орон сууц хувьчлахтай адил бичиг баримт Засгийн газрын хуралдаанаар дэмжигдлээ гэж үзэж байна. Өөрөөр хэлбэл, Монгол Улсад ардчиллыг хөгжүүлэх, улс орны хөгжлийг түргэтгэх, төр, иргэн, нийгмийг хариуцлагатай байлгах тал дээр чухал үүрэг гүйцэтгэх бичиг баримт дэмжигдлээ. -Үнэт цаасны тухай хуульд нэмэлт, өөрчлөлт оруулах тухай асуудал Засийн газрын хуралдаанаар хэлэлцэгдсэн. Энэ асуудлыг хэрхэн шийдвэрлэсэн бэ? -Монгол Улс дэлхийн хөрөнгийн зах зээл дээр гарч ажиллах, олон улсын хөрөнгийн биржүүдтэй хамтран ажиллах боломж бүрдэж байгаа. Дэлхийн хөрөнгийн зах зээлийн дүрмээр Монгол Улс тоглохын тулд зайлшгүй дотоодын хууль тогтоомждоо нэмэлт, өөрчлөлт оруулах шаардлага үүсэж байна. Гадны компаниуд Монголд орж ирээд хувьцаа худалдаж авах, эсвэл монголын компани, иргэн гадаадаас хувьцаа авах, зарах харилцааг энгийн бөгөөд бусад улс орны эрх зүйн зохицуулалттай адилтгаж байгаа юм. -Энэ хуульд өөрчлөлт оруулбал, “Эрдэнэс Тавантолгой” команийн IPO хийх хугацаа ойртоно гэж ойлгож болох уу? -Болно. Ний нуугүй хэлэхэд, “Эрдэнэс Тавантолгой” компани одоо IPO хийхэд нэгж хувьцааны үнэ багаар тогтоогдох магадлалтай байна. Үүнд дэд бүтэц нь шийдэгдээгүй байгаа нь нөлөөлж байна. Тухайн төсөл эргэлзээтэй бол мэдээж үнэ нь унана. Одоо өрнөж байгаа улс төрийн хэрүүл, төмөр зам гээд олон асуудал эргэлзээ төрүүлж байхад нь Тавантолгойд IPO хийвэл үнэгүйдүүлнэ. Өөрөөр хэлбэл, бид Монголдоо байгаа үнэтэй баялагаа хамгийн тохиромжгүй үед нь хувьцааг нь зарж, бага үнээр бусдын өмч болгохоос Засгийн газар сэргийлнэ. Энэ бүхэн цэгцрээд өндөр үнэд хүрэхээр болоод ирэхээр нь гаргах нь зүйтэй гэж үзэж байна. -Хонконгийн хөрөнгийн биржээс манай улсыг одоогийн Үнэт цаасны тухай хуульдаа өөрчлөлт оруулахгүй бол олон улсын хөрөнгийн зах зээл дээр ажиллах боломжгүй гэсэн зүйл тавьсан гэсэн. Энэ үнэн үү? -Бидний урилгаар Лондонгийн хөрөнгийн биржийн хүмүүс Монголын хөрөнгийн биржийг удирдаж, арга зүйн хувьд авч явж байгаа. Хонконгийн хөрөнгийн бирж дээр Монголын нэлээд олон аж ахуйн нэгж хувьцаа гаргаад явж байна. Бидний зүгээс яах аргагүй Лондон, Хонконгийн хөрөнгийн биржтэй хамтран ажиллахын тулд эрх зүйн нэг орчинтой болох шаардлага байгаа. Энэ нь Монголын аж ахуйн нэгж, иргэдэд хэрэгтэй. Ганц Тавантолгойн хувьцааг гаргахад биш, Монголын нийт иргэдийн эрх ашигт нийцэж байгаа учраас бид дэлхийн стандартад нийцсэн эрх зүйн орчинд Монголын хөрөнгийн биржийг ажиллуулъя, аж ахуйн нэгж, иргэд ч энэ орчинд хувьцаагаа гаргах, худалдаж авах боломжийг нээж өгье гэж энэ хуулийг гаргасан юм.   -Засгийн газрын өнөөдрийн хуралдаанаар зам засварын ажлын талаар хэлэлцсэн гэсэн. Ямар шийдвэр гарсан бэ? -Бүтээн байгуулалттай холбоотой асуудлыг улам шуурхайлах зорилгоор нийслэлийг хөдөө орон нутагтай холбох, Улаанбаатар хотын түгжрэлийг багасгах зорилгоор гол гол чиглэлийн замын ажлыг одоо цаг алдалгүй ажлыг эхлүүлэхээр Засгийн газраас тогтоол гаргасан. -Өнөөдөр Ардчилсан намын дарга Н.Алтанхуяг иргэн бүрт олгох нэг сая төгрөгийн талаар мэдээлэл хийсэн. Энэ асуудалд Засгийн газар хойрог хандаж байна гэж шүүмжилсэн. Та Засгийн газрын гишүүний хувьд энэ асуудалд хариулт өгөөч? -Н.Алтанхуяг даргын хийсэн мэдэгдлийг сайтаас уншсан. Мэдээлэл хийх үеэрээ энэ мэдэгдэлийг хийхэд Ерөнхий сайдыг ирээгүй гэсэн байсан. Уг нь долоо хоногийн лхагва гараг бүр Засгийн газрын ээлжит хуралдаан болдог гэдгийг бид бүгдээрээ мэдэж байгаа. Засгийн газрын хуралдааныг Ерөнхий сайд ахалдаг. Ерөнхий сайдыг эзгүйд Тэргүүн шадар сайд, Шадар сайд хурлаа ахалдаг. Өнөөдрийн нөхцөлд Тэргүүн шадар сайдын  суудал байхгүй болсон. Шадар сайд гадаадад томилолттой байгаа учраас Ерөнхий сайд өөрөө ахлаас өөр боломжгүй байсан. Ийм үед хамтарсан мэдэгдэл хийнэ гэж зар тараах нь цагаа олоогүй зүйл гэж би үзэж байна. -Нэг сая төгрөгийг гурав хувааж олгох болсон нь хэр оновчтой юм бэ? -Энэ мөнгийг 4-6 хүртэл гурав хувааж олгох шийдвэр гаргасан. Өнгөрсөн хоёр сард энэ мөнгийг яагаад олгоогүй юм бэ гэдэг асуудал сөхөгдөж байгаа. Тухайн үед цалин, тэтгэврийг нэмэгдүүлэх, цагаан сарын үед энэ мөнгийг олгохоор өргөн хэрэглээний бараа бүтээгдэхүүний үнэ дээшээ хөөрөгдөж, тогтдог. Тиймээс энэ мөнгийг олгохгүй байх нь зүйтэй гэсэн шийдвэрийг УИХ дээр гаргасан. Гуравдугаар сард мөн адил байсан. Бүгдийг нь нэг дор олгох боломж байхгүй. Ингэж олговол инфляц хөөрөгдөнө. Санхүү, эдийн засгийн бодит байдалд ч нийцэхгүй. Энэ мөнгийг гурав хувааж өгөхөд шаардлагатай мөнгийг цуглуулахаар Засгийн газар ажиллаж байгаа. Хавар буюу I улиралд хамгийн бага мөнгө улсын төсөвт хуримтлагддаг. Эд ажил явагдаж байдаг бусад улиралд байдал өөр болдог. Тиймээс Засгийн газар өөр дээр төвлөрч байгаа мөнгө, бололцоо, эдийн засагт үзүүлэх нөлөөгөө бодож ийм шийдвэр Засгийн газар гаргасан. Үүнийг Засгийн газар ажлаа хийгээгүй гэж хэлж болохгүй байх. Ардчилсан намтай хамтарч ажиллахад их зүйл хийсэн. Гэтэл одоо салаад сонгууль болоход хоёрхон сар дутуу байх үед хэтэрхий сонгуульд оноо авах гэж нэгнийгээ хараар “будаж” байна. Эргэж улс төрд  зөвшилцөл, ойлголцол гэдэг зүйлий дахиж сэргээхгүйгээр хааж болохгүй гэдгийг хэлмээр байна. Монголын төр цаашид ямар ч үед зөвшилцөх, ойлголцох боломжтой байх ёстой.   С.Заяа