Баянзүрх дүүргийн Засаг даргын зөвлөлийн хурал өнөөдөр болж, нийт  зургаан асуудал хэлэлцжээ. Тухайлбал, “Хөрөнгө оруулалт - Иргэдийн оролцоог нэмэгдүүлэх жил”-ийн хүрээнд хийгдэх ажлын төлөвлөгөө, “Тогтвортой амжиргаа-II” төслийн хүрээнд тус дүүрэгт хэрэгжүүлэх төслүүдийн саналыг хэлэлцэв. Үүний дараа СӨХ-дын 2011 оны үйл ажиллагаанд түвшин тогтоох үзлэг явуулсан дүнгийн мөрөөр авах арга хэмжээ, СӨХ-той гурван талт гэрээ байгуулах талаар хэлэлцсэн бөгөөд сууц өмчлөгчдийн холбоодын хяналтыг сайжруулах боловсронгуй болгох, цаашилбал СӨХ-дыг халах саналыг орууллаа.   Тус дүүргийн Үйлдвэрлэл үйлчилгээний хэлтсийн дарга Б.Содонбаатар орон сууцны конторт СӨХ-ийн үйл ажиллагааг шилжүүлэх санал гаргалаа. Орон сууцны конторт шилжүүлж, төрийн мэдэлд ирснээр аливаа ажлыг илүү чанартай, төсвийн зарцуулалт илүү үр дүнтэй болно гэж албаныхан дүгнэж байна. Мөн энэ үеэр тус дүүрэгт үйл ажиллагаа явуулж байгаа төрийн бус байгууллагуудтай Засаг даргын Тамгын газар нь хамтран ажиллах гэрээ байгуулж төрийн зарим нэг чиг үүргийг ТББ-д шилжүүлэх ажлыг зохион байгуулахаар болжээ. Үүнд Улаан загалмайн нийгэмлэг, Богдхан уулын байгалийн цогцолбор төв, Карьер хөгжлийн хүрээлэн, Хэрэглэгчдийн эрх ашгийг хамгаалах нийгэмлэг,  Монголын боловсролын шинжлэх ухааны үйлдвэрчний эвлэл зэрэг есөн байгууллагатай гэрээ байгуулан ажлын үр дүнг тооцож ажиллах гэнэ.   Баянзүрх дүүрэг 2012  оныг хөрөнгө оруулалт иргэдийн оролцоог нэмэгдүүлэх жил болгон зарласан бөгөөд иргэдэд чиглэсэн төсөл арга хэмжээнүүдийг боловсруулан, иргэдийг ажлын байртай болгоход илүүтэй анхаарч ажиллах аж.  Мөн иргэдийн амьдрах тав тухтай орчныг сайжруулахад анхаарах бөгөөд энэ жил тус дүүрэгт 140 сая төгрөгийн тохижилтын ажлыг хийхээр болжээ.   П.Наран