“Эмэгтэйчүүдийн улс төрийн оролцоог нэмэгдүүлэх арга замыг тодорхойлох нь” сэдэвт Азийн бүсийн бага хурал Улаанбаатар хотноо амжилттай өндөрлөсөн талаархи мэдээллийг өнөөдөр Төрийн ордонд хийлээ. Уг хурлыг Монгол Улсын Засгийн газрын Жендэрийн үндэсний хорооноос НҮБ-ын Хөгжлийн хөтөлбөртэй хамтран Азийн төвийн эмэгтэйчүүдийн улс төрийн оролцоог нэмэгдүүлэх үндэсний стратегийг тодорхойлох зорилгоор зохион байгуулсан байна. Энэ сарын 3, 4-нд “Чингис” зочид буудалд болсон тус бага хуралд Зүүн умард болон Зүүн өмнөд Азийн 11 орны парламентын гишүүд, Засгийн газар, иргэний нийгмийн хийгээд НҮБ-ын төлөөлөгчид оролцож, Ази тив дэх эмэгтэйчүүдийн улс төрийн оролцооны нөхцөл байдалд бодит дүгнэлт хийсэн, тулгамдаж буй асуудал, түүний гарц, шийдлийн талаар хэлэлцсэн байна. Түүнчлэн бүс нутгийн хэмжээнд хамтын ажиллагаа өргөжүүлэх, цаашдын стратеги төвөлөгөөг хамтран боловсруулжээ. Уг хурлын үеэр удахгүй сонгуульд оролцох гэж байгаа монголын эмэгтэй улстөрчдөд бусад улсын улстөрчид туршлагаасаа хуваалцаж, амжилт хүссэн байна. Сонирхуулахад, “Эмэгтэйчүүдийн улс төрийн оролцоог нэмэгдүүлэх арга замыг тодорхойлох нь” бага хуралд оролцсон улс орнуудын улс төр дэх эмэгтэйчүүдийн оролцооны хувьд Балба Улс 33 хувиар тэргүүлж байгаа бол Афганистан, Лаос зэрэг орнууд 25 хувьтай удаалж байгаа аж. Харин Монгол Улс гурван хувиар сүүл мушгидаг байна. С.Жигүүр