Улсын бүртгэлийн ерөнхий газрыг татан буулгах гэж байгаа тухай зар өчигдөр тарж, Хүүхдийн урлан бүтээх төвийн байранд шуурхай хурал зарласан талаар өмнө нь мэдээлсэн. Уг шуурхай хуралд тус байгууллагын бүх ажилчид цугласан бөгөөд сэтгүүлчдэд хаалттай хуралдаан болов. Тус хурлаар УБЕГ-ын Эд хөрөнгийн эрхийн бүртгэлийн албыг татан буулгаж, төрийн үйлчилгээг иргэдэд ойртуулж, үйлчилгээний ачаалал, төвлөрөлийг саармагжуулах, хүртээмжийг сайжруулах зорилгоор үйлчилгээний зохион байгуулалтын  өөрчлөлт оруулж, хэлтэсүүд болгон хувиарлажээ.  Мөн УБЕГ-ын Эд хөрөнгийн эрхийн бүртгэлийн газрын дарга Л.Чантуулодой, Иргэний бүртгэлийн газрын дарга Д.Энхцэцэг нарыг  албан тушаалаас нь ажлаас чөлөөлсөн байна. Ямартай ч, УБЕГ-ыг  татан буулгах бус, олон даргатай том бүтцийг багасгах зарчимаар ажиллахаа тус газрын дарга Л.Амарсанаа мэдэгдсэн. Харин ажлаас халагдсан дарга нарын хувьд “УИХ-ын Сонгуулийн хуулийн дагуу СЕХ-той хамтарч сонгууль зохион байгуулах нэг субъект нь Иргэний бүртгэлийн газар.Сонгууль эхлэхээс өмнө сонгогчдын нэрсийн жагсаалт гаргах, иргэдэд цахим үнэмлэх олгох их ажлын үеэр бүтэц өөрчилж, Иргэний бүртгэлийн газрыг жижиглэж хэлтсийн хэмжээнд орууллаа. Ямар судалгаанд түшиглэж үүнийг хийж байгааг шалгуулахаар тангараг өргөсөн төрийн албан хаагчийн хувиар холбогдох газарт нь хандана” гэв. П.Наран