Чихрийн шижингийн II хэв шинж нь олон улс оронд эпидеми байдлаар тархсан өвчлөл аж. Ихэнх тохиолдолд 40-өөс дээш насанд илэрдэг. Үүнтэй холбоотой Эрүүл мэндийн яам, Эрүүл мэндийн газар, "Мянганы сорилтын сан"-аас чихрийн шижин хэв шинж хоёрын  илрүүлэг энэ сарын долооноос эхлэн жил бүр  тогтмол явагдахаар болжээ. Уг үзлэгт 40-өөс дээш насны эрэгтэй, эмэгтэй бүх хүмүүс хамрагдах бөгөөд харьяа өрхийн эмнэлэг болон эрүүл мэндийн газарт хандах боломжтой. Энэхүү үзлэгээр биеийн жингийн индексийг тодорхойлох, чихрийн шижингийн эрсдэлийн шалгуураар бүх хүнийг үнэлэх ба шалгуураар 11 буюу түүнээс дээш оноо авсан хүмүүст түргэвчилсэн аргаар өлөн үеийн цусны глюкозын хэмжээг тодорхойлох юм. Түүнчлэн 24-28 долоо хоногтой бүх насны жирэмсэн эмэгтэйчүүдэд өлөн үеийн цусны глюкозын хэмжээг тодорхойлох бөгөөд шаардлагатай тохиолдолд нүдний үзлэг, хөлийн болон захын мэдрэлийн үзлэг хийнэ. Мөн үзлэгт хамрагдахыг хүссэн иргэд найман цагийн турш юм идээгүй байх ба уснаас өөр зүйл уугаагүй байх шаардлагатай аж.