Дархан-Уул аймгийн Дархан хотыг “Загвар хот” болгон хөгжүүлэх Засгийн газрын шийдвэрийн дагуу Монгол Улсын Шадар сайд М.Энхболдоор ахлуулсан “Загвар хот”-ын хөгжлийн хөтөлбөр боловсруулах ажлын хэсэг байгуулагдсан. Тус ажлын хэсгийн дэд даргаар ҮХШХорооны дарга Ч.Хашчулуун, гишүүдийн бүрэлдэхүүнд Сангийн сайд Д.Хаянхярваа, ХХААХҮ-ийн сайд Т.Бадамжунай, Дархан-Уул аймгийн иргэдийн Төлөөлөгчдийн Хурлын дарга Л.Гүнчин, Дархан-Уул аймгийн Засаг дарга Г.Эрдэнэбат зэрэг албаны хүмүүс ажиллаж байна. ҮХШХорооноос энэхүү асуудлыг мэргэжлийн хүрээнд хэлэлцэн ярилцах зорилгоор тус ажлын хэсгийнхэн болон эрдэмтэн багш нар, Дархан-Уул аймагтай холбоотой ажилладаг хувийн хэвшлийнхнийг оролцуулсан нээлттэй хэлэлцүүлэг, чөлөөт ярилцлагыг өчигдөр зохион байгуулав. Дархан хот нь ОХУ болон БНХАУ-г холбосон тэнхлэгийн авто зам болон төмөр зам дээр оршдог, эрчим хүчний хувьд Дулааны цахилгаан станцтай, төвийн эрчим хүчний системд холбогдсон эх үүсвэртэй. Усан хангамжийн дулааны эх үүсвэртэй. Харилцаа холбооны хувьд өндөр хурдны шилэн кабелиар улс, хот хооронд холбогддог. Мөн дэд бүтцийн салбарууд сайн хөгжсөн үйлдвэрлэл, соёл боловсрол, шинжлэх ухааны томоохон төв тул гадаадын хөрөнгө оруулалтыг татах таатай нөхцөл бүрдсэн хот аж. Түүнчлэн барилгын материалын үйлдвэрийн бааз суурь болгохуйц түүхий эд болох элс, төрөл бүрийн барилгын чулуулаг, төмрийн хүдэр, нүүрс, керамзит шаврын ордоор баялаг бүс нутаг. Монголын газар тариалангийн төв бүсэд оршдог учраас хөдөө аж ахуйн нийт бүтээгдэхүүнд газар тариалан голлодог бөгөөд газар тариалангийн аж ахуйнууд шинжлэх ухааны баазтайгаа ойрхон байрлаж, түүнтэй хамтран ажилладагаараа бусад аймгуудаас давуу талтай гэдгийг уулзалтад оролцогчид онцоллоо. П.Наран