Фенобарбитал эмийн тунг хэтрүүлэн хэрэглэсэн 16 хүүхэд ЭХЭМҮТ-д хэвтэн эмчилгээ хийлгэж байгаа. Энэ нь “Монос”-ын салбар эмийн сангийн жор баригчийн буруугаас болсон. Түүнчлэн уг эм нь стандартын шаардлага хангаагүй байсан зэрэг мэдээлэл өчигдрөөс хойш олон нийтэд хүрсээр байна. Энэ асуудлаар өнөөдөр нийслэлийн Эрүүл мэндийн газраас хэвлэлийнхэнд мэдээлэл хийлээ. Хуралд НЭМГ-ын орлогч дарга Б.Ганбат, Хүүхэд өсвөр үеийн асуудал хариуцсан мэргэжилтэн н.Бадамханд, Эм, эмнэлэгийн хэрэгсэл тоног төхөөрөмжийн асуудал хариуцсан мэргэжилтэн н.Болдбаатар болон “Эмийн үйлдвэр” компанийн захирал О.Дамбаа нар оролцлоо. Тэд сэтгүүлчдийн асуултад хариулав.
х
-Уг асуудал дээр НЭМГ хэрхэн ажиллаж байна вэ?
-Манай зүгээс энэ асуудлаар зохих албан тушаалтан байгуулагуудын хүмүүстэй харилцаж учир шалтгааныг нь тодруулан ажилаж байна. Эхний байдлаар эмийн түгээлт хийсэн буюу уг эмийг худалдан борлуулсан эмийн санчийн хариуцлагагүй, буруутай үйл ажиллагаатай холбоотой гэсэн дүгнэлтийг хийж байна. Гэхдээ холбогдох байгууллагуудын дүгнэлт гарахаар эцэслэн шийдвэрлэж, хариуцлагын асуудал яригдах болно. Энэ нь эмийн үйлдвэрлэл, ханган нийлүүлэлт, түгээлтийн үйл ажиллагаатай холбоотой анхаарал татсан асуудал болоод байна. Фенобарбитал буюу Люминал гэх энэ эм нь насанд хүрсэн хүн ууж хэрэглэх буюу 100 мг-тай 10 шахмалаар, хүүхдэд зориулсан нь 5 мг-тай 10 шахмалаар үйлдвэрлэгдсэн. Гэхдээ энэ хоёр эмийн хэмжээ, савлагаа, баглаа боодол нь ялгаагүй байгаа юм. Зөвхөн 5 мг, 100 мг гэдэг бичгээрээ л ялгаатай гэсэн үг. Тиймээс үүнийг түгээж буй эмийн санч сайтар анхаарах ёстой. Үүнтэй холбогдуулж НЭМГ-аас санамж бичиг гаргаж, харьяа байгуулагууд болон эмийн сангуудад хүргүүлсэн. Мөн эмийн жор бичиж өгч байгаа эмч нар хэрэглэгчдэд дэлгэрэнгүй тайлбарлаж өгөх, иргэд авч байгаа эм, бүтээгдэхүүнээ нарийвчлан шалгах хэрэгтэй гэсэн зөвлөмж өгч байна.
а
-Эмийн гадуур тараагдсан хэмжээг тогтоосон уу?
-Уг эм нь нийтлэг хэрэглэгддэг. Нярайд тайвшруулах зорилгоор, таталт өгсөн үед нь судсаар тарьж хэрэглэх тохиолдол бий. Аль эмийн санд ямар хэмжээгээр тараагдсан талаарх тодорхой тоо гараагүй байна.
ө
-Мэргэжлийн хяналтын байгууллагаас эмийг буцаан татах талаар ярьсан.
-НЭМГ-ын зүгээс бол нэгэнт үйлдвэрлээд тараачихсан байгаа эмийг татах, устгах гэхгүйгээр аль болох урьдчилан сэргийлэх байдлаар санамж анхааруулгыг өгөх талаас нь анхаарч байна. Гэхдээ Фенобарбитал шиг сав баглаа, боодол нь ялгагдахгүй эмүүдийг өнөөдрөөс эхлээд хориглож байгаа. Эмийн үйлдвэрүүдэд адилхан савлагаа, боодолтой эм үйлдвэрлүүлэхгүй байх талаар мөн анхаарна.
а
-НЭМГ-аас эмийн санч, эмийн сангуудад хяналт тавьдаг уу?
-Энэ асуудалд холбогдох байгууллагууд дүн энэ шинжилгээ хийж байгаа. Монгол Улсад эмчлэх, сувилах, эм барих гэх гурван гол лицензийг олгодог. Энэ нь тодорхой дүрэм журмаар зохицуулагддаг. Мэргэжлийн байгууллагууд алдаа дутагдлыг тодорхойлсон тохиолдолд харьяа эмийн сангийн эмийн найруулагчийн мэргэжлээрээ ажиллах зөвшөөрлийг түдгэлзүүлэх, цуцлах хүртэл арга хэмжээг манай зүгээс авах эрхтэй. Цаашдаа эмийн сангуудын үйл ажиллагаа, тусламж үйлчилгээний чанартай холбоотой тодорхой үйл ажиллагаа явуулахаар төвөвлөж байгаа.
а
-Өмнө нь эмийн санч ийм алдаа, дутагдал гаргаж байсан тохиолдол бий юу?
-Манай хамгийн сайн түгээлт хийдэг байгууллагад энэ алдаа гарлаа. Өмнө нь ийм тохиолдол мэр сэр гарч байсан. Гэхдээ үүн шиг олон хүнийг хамарсан алдаа гарч байгаагүй. Энэ нь манай эмч зүйч, эмийн санчид ажлын хариуцлагаа дээшлүүлэх болон манай байгууллагын зүгээс хяналт шалгалтыг эрчимжүүлэх, алдаанаас урьдчилан сэргийлэх ажлуудаа идэвхжүүлэх болсон гэдгийг харуулж байна.
х
О.Дамбаа: Эмийн чанар, стандартад асуудал гарвал үйлдвэр хариуцна
“Эмийн үйлдвэр” компанийн захирал
а
-Танай компанид үйлдвэрлэсэн Фенобарбитал эмээс хэд хэдэн зөрчил илэрсэн учир эргүүлэн татах талаар Мэргэжлийн хяналтын байгууллагаас мэдээлж байсан.
-Мэргэжлийн хяналтаас манай эмийг стандартын дагуу хийсэн байна уу, юу нь зөрчигдөж вэ, бүртгэл нь ямар шатандаа байна зэргийг хянаж, шалгаж байна. Лабораторид тодорхой дээж өгч, шинжилгээнд хамруулна. Эцсийн шийд гараагүй байгаа үед татна, устгана гэсэн юм яригдаагүй гэж би ойлгож байна. Өнөөдөр Төв аймгаас “устга гэлээ” гээд ярьсан. Тэгэхээр нь би эцсийн шийд гартал хүлээ гэсэн. Фенобарбиталыг 1976 оноос хойш Монголд ганцхан манай үйлдвэр хийж байсан. Өдий болтол ноцтой юм гараагүй. Үйлдвэрийн шаардлагаар бол тухай бүтээгдэхүүнийхээ эцсийн хариуцлагыг үйлдвэр хүлээх ёстой. Буруу юм байгаад үнэхээр буруутай нь нотлогдвол хэнээс ч зугтахгүй тухайн эм үйлдвэрлэсэн үйлдвэр л хариуцна. Фенобарбитол буюу Люминолын 100 мг-тай, 5 мг-тай эмүүдэд чанарын болон стандартын бус зүйл гарвал түүнд холбогдох хариуцлагыг хүлээх нь зүйтэй. Харин тэнд нэг хүн андуурч өгөөд, түүнийг нь хүмүүс хэрэглээд асуудал үүссэн нь өөр хэрэг. Шаардлага гарвал үүнийг хэн хариуцах, хохиролыг хэн хүлээх дээр саналаа илэрхийлэх эрх байгаа. Манай улсад энэ эмийн хэрэгцээ, хэрэглээг судалсан зүйл байхгүй. Гэхдээ жилээс жилд хэрэгцээ нь өсч ахмад настан, нярай, хүүхэд маш их хэрэглэж байгаа. Энэ эмийг 2010 оноос хойш 5 мг-аар буюу хүүхдүүд зориулсан тунгаар Олон улсын стандартын дагуу үйлдвэрлэж эхэлсэн. Үүнээс өмнө 100 мг-тай нэг ширхэг эмийг 10 хуваагаад хүүхдэд уулгадаг байсан.
а
-Уг эмийг улсын бүртгэлд бүртгүүлээгүй байсан гэсэн мэдээлэл байна.
-Улсын бүртгэлд бүртгүүлсэн эм.
а
Б.Буд