МАН-аас хэвлэлийн хурал хийж, бага хурлаар хэлэлцсэн асуудал болоод гарсан шийдвэрийн талаар сэтгүүлчдэд мэдээлэл өглөө. Хэвлэлийн хуралд МАН-ын дарга М.Энхболд, УИХ дахь бүлгийн дарга С.Бямбацогт, Ерөнхий нарийн бичгийн дарга Ж.Мөнхбат, УИХ-ын гишүүн Ч.Хүрэлбаатар, Н.Энхболд нар оролцов.

МАН бага хурлаараа 2016 оны УИХ болон орон нутгийн сонгуульд оролцох мөрийн хөтөлбөрөө баталж, өнөөдөр Үндэсний аудитын газар хүргүүлжээ. Мөн энэ хурлаар сонгуульд нэр дэвшигчдийг тодруулах журмыг баталжээ. Уг журамд тухайн орон нутгийн иргэдийн санал дээр тулгуурлан нэр дэвшигчдийг тодруулах асуудлыг тусгасан аж. Бас намын зохион байгуулалтын ажлаа хэлэлцжээ. УИХ-ын Ц.Даваасүрэн, Х.Болорчулуун нар МАН-ын гишүүнчлэлээ сэргээж, сонгуульд бидний мөрийн хөтөлбөрийг дэмжиж ажиллахаар намын бага хурлын гишүүн болсон. Энэ хоёр хүнээс илүү тэдний дэмжигчдийн дуу хоолойг сонсох зорилготойгоор тэдний нэгийг бодлогынхоо байгууллагад оруулах нь зүйтэй гэж үзсэн, Ц.Даваасүрэнг удирдах зөвлөлийн гишүүнээр авсан гэдгийг МАН-ын дарга М.Энхболд хэлэв.

МАН-ын дарга М.Энхболд:

Бидний нэлээд анхаарал тавьж, цаг хугацаа зарцуулан ач холбогдол өгсөн нэг асуудал бол МАХН-тай эвсэх тухай байсан. Энэ сарын 17-ны ням гаригт МАХН-тай эвсэх асуудлаар сар гаруйн хугацаанд зөвшилцсөн хоёр ажлын хэсгийн дарга нар зургаан зүйл дээр санал тохиролцож, гарын үсгээ зурсан. Гарын үсэг зурсан саналыг манай намын удирдах зөвлөл хэлэлцээд, бидний тавьсан санал бага орсон ч эвсэх асуудал нь эвсэх нь зүйтэй гэж бага хуралдаа энэ асуудлыг оруулсан. Энэ асуудлыг хэлэлцэж байх явцад  МАХН-ын удирдлагуудын зүгээс гарын үсэг зурж, баталсан гэрээ, хэлэлцээртээ нэмж, өөрчлөлт оруулах саналыг гаргасан. Манай нам эхэлж 80:20 гэж санал болгосон. МАХН 60:40 гэсэн санал гаргасан. Ажлын хэсгийн дарга нарын гарын үсэг зурж, тохиролцсон баримт бичигт 33:67 гэсэн хувь байсан. Эндээс хэн нь хүлээцтэй, саналд нь хүндэтгэлтэй хандаж байсан нь харагдана. Гарын үсэг зурсан санамж бичиг тогтсон зүйлүүдээсээ буцахгүй, өөрчлөхгүй, буцахгүй гэж тохиролцсон байсан. Бидний дөрвөн жил удирдлага авч явах бичиг баримтаа дөрөв хонож чадалгүй, гурав дахь хоног дээр нь өөрчлөх саналыг тавьсанд үнэхээр итгэл алдуурсан. Бидний багагүй хугацаанд бодож, хүсч байсан эвсэл биелэлээ олж чадсангүй. Гэхдээ энэ удаагийн сонгуульд эвсэж орж чадаагүй ч цаашид хоёр нам эвлэж, нэгдэх асуудал байсаар байх болно гэдгийг МАХН-ын жирийн гишүүдэд хандаж хэлье. Байлгахын төлөө би зүтгэнэ, бид ажиллана.

 В.Бат